طباعة الصفحةمرتضى منصور رئيساً لمصر
بقلم : سامي البحيري |
2014-04-13 15:40:04
ما يعجبني في المستشار مرتضى منصور انه راجل "اللي في قلبه على لسانه" ولا يهمه ان يعادي كل الناس ما دام يقول ما في نفسه وعلى الهواء مباشرة وبدون اي تزويق، ولا يعترف بشيء اسمه الدبلوماسية، ميزة اخرى هائلة هو ان لديه بنك معلومات فضائح رهيب ملء بالسيديهات أشكال وألوان، لذلك اذا قدر له ان يكون رئيساً لمصر فلن يستطيع اي مواطن ان يفتح بقه والا ظهر له "سيديهاية"عند الرئيس مرتضى منصور. ويربطني بالمستشار مرتضى منصور رابطة هامة جداً وهي أني زملكاوي كما انه شيخ القبيلة الزملكاوية.
واستغلالا لتلك الرابطة قررت ان أزوره لعمل حديث صحفي معه بمناسبة ترشحه لرئاسة مصر، وذهبت اليه في نادي الزمالك، ورايته جالسا حول حمام سباحة النادي وحوله مجموعة من مريديه، وسمعته يزعق بصوت عالي:
- الواد ال .... اللي قاعد تحت الشمسية سيب ايد البنت أحسن أجي لك اطلع عين اهلك
- البت اللي ماشية هناك بالبنطلون المحزق ده، اذا أبوكي وافق تخرجي كده، انا مش حا اوافق تقعدي كده في النادي بتاعي ياروح قلبي!
....
وفكرت في ان انسحب لما رأيت انه ربما يكون مزاجه متعكر بعض الشيء، ورأيت على سبيل الاحتياط ان أخذ احد موظفي النادي على جنب وأقول له:
- انا فلان الفلاني وعندي موعد مع مرتضى بيه
- اهلًا بيك ، والموعد بخصوص ايه
- انا عاوز أخد معاه حديث صحفي
- آه اهلًا وسهلا
- بس انا شايف مزاجه مش قوى
- لا يا بيه ده مزاجه كده على طول، هو بيحب يزعق بس قلبه ابيض زي القشطة
واتقدم منه وانا مازلت اقدم رجل واوخر رجل، وأخيرا استجمعت كل شجاعتي واقتربت
- سلامو عليكو
- سلام اهلًا .. مين حضرتك.؟
- انا سامي البحيري
- اي خدمة
- انا جاي اعمل حديث صحفي معك
- انت من جرنال ايه ولا من اي قناة
- انا من صحيفة الكترونية
- الكترونية إزاي يعني؟
- يعني احنا بننشر بس على الانترنت
- انا باكره ام الانترنت دي، هي سبب كل البلاوي اللي العالم شايفها الأيام دي
- ايوه بس احنا جريدة محايدة ولسنا جريدة اثارة او إشاعات
- أتفضل اسأل يا سيدي
- اولا مبروك لفوزك برئاسة نادي الزمالك، انا زملكاوي وان شاء الله نادي الزمالك على أيدك يرجع للبطولات
- بطل بكش ، هات من الاخر ، ايه أسألتك
- ايه اللي خلاك تقرر ترشيح نفسك لرئاسة مصر؟
- انت قلت لي اسمك ايه تاني؟
- سامي البحيري
أستني شوية
(اخرج مرتضى منصور من شنطته دفتر كبير في حجم دليل التليفون- وأخذ يقلب الصفحات بمهارة وهو يقول):
- سامي ... سامي... سامي ابراهيم... سامي احمد ... سامي الببلاوي... ايوه .. سامي البحيري
- انت سامي البحيري من مصر القديمة .. صح
- ايوه
- مش انت كنت بتاخد البت آمال جارتكم تحت بير سلم بيتكم في مصر القديمة، وتعلموا حاجات مش ولا بد، السديهاية بتاعتك عندي في المكتب.
- معقول آمال طلعت عندك؟ ده كلام من زمان قوي
- كله عندي في السديهات وكله يطلع وقت اللزوم، نرجع لموضوعنا بقى كنت سألتني عن سبب ترشيحي لرئاسة مصر؟ وانت مال اهلك انا مزاج أمي كده، مش ده حق لكل مواطن يرشح نفسه
- طبعا ده حق كل مواطن، لكن لا بد يكون عندك أمال كبيرة لمصر نفسك تحققها
- آه طبعا، انا نشأت في حواري روض الفرج وتربيت تربية شوارع لا مؤاخذة ، وشفت الناس الغلابة اللي صابرة على الهم بقالها سنين وما حدش حاسس بيها، دول الناس اللي لابد أغير حياتهم
- طيب مصر بتواجه مشاكل كبيرة، وأهمها مشكلة تزايد السكان الرهيب، إزاي تقدر تواجه المشكلة دي؟
- دي مشكلة بسيطة جدا، انا حا اعمل زي الصين، كل أسرة تخلف طفل واحد، وبعد كده تقطع الخلف، والراجل اللي حيخالف القانون ده، ما فيش قدامي غير أني اقطع له.... انت فاهم يعني!!
- آه فاهم طبعا، طيب دلوقت مصر داخلة على مشكلة كبيرة مع اثيوبيا بخصوص سد النهضة، إزاي حتواجه المشكلة دي؟
- الحقيقة دي مشكلة صعبة جدا، ويمكن اخطر مشكلة في تاريخ مصر القديم والحديث، مصر لا شيء بدون النيل، ومحمد علي باشا كان عنده حق لما أخد الجيش المصري واحتل منابع النيل، لكن الوضع دلوقتي مختلف، اول رحلة حا اعملها بعد ما يتم انتخابي أني اروح اثيوبيا عشان افهم الموضوع بالضبط وأحاول احل الموضوع بطريق ودية مع رئيس اثيوبيا، واذا الطريقة الودية ما نفعتش يبقى كل ام الخيارات مفتوحة، بما فيها اننا نفشخ ام اثيوبيا
- مشكلة البطالة بتعاني منها كل أسرة في مصر، ياترى ايه الحل في رأيك ؟
- البطالة هي اول طريق الجريمة، وكل العيال الصيع اللي محتلين شوارع مصر كلها، لو كان عندهم شغلانة تانية ما كانش انتشروا في الشوارع بالشكل ده، والبطالة حلها في ثلاث نقاط : تحقيق الامن وتشجيع الاستثمار وعودة السياحة.
- طيب نمسك الثلاث نقاط واحدة واحدة، ونبدأ بالأمن
- طبعا الامن عندي اهم من الحرية واهم من الديموقراطية ، لانه بدون امن يبقى ما فيش بلد وما فيش دولة وكل واد صايع بلطجي إبن مرة و..... يقدر يعمل اللي هو عاوزه، ودلوقتي الناس بدأت تترحم على ايام حسني مبارك عشان الامن، وأول قرار حا عمله هو أني حا أعفي عن حبيب العادلي وأعينه وزير داخلية وحيكون عنده تعليمات يضرب في المليان، اي عيل صايع يعمل دوشة في الجامعة يشتم أستاذه او يحرق مكتب او يعتصم ما فيش عندي الا أني ابعثه على معسكر الامن المركزي لمدة سنتين، وهناك حيتعلم الأدب، واللي ما ربهوش ابوه وأمه تربيه الأيام والليالي، واللي ما ربهوش الأيام والليالي يربيه مرتضى منصور. وبعدين العيال اللي يقولك اخوان ولا ٦ ابريل ولا ٢٥ يناير وكل العيال الصيع دول مصيرهم المعتقل في الواحات وحا افتح معتقلات جديدة في حلايب وشلاتين وتوشكى وابعث كل العيال الصيع اللي مبوظين البلد في عربيات نقل بهائم ويروحوا يزرعوا ارض هناك لغاية ما يعرفوا ان الله حق والمحاكمات العسكرية والفورية حتكون على ودنه، وحالة الطواريء ترجع تاني لغاية ما البلد تقف على حيلها تاني
- طيب بالنسبة لتشجيع الاستثمار؟
- انا حا اروح أزور السعودية والإمارات والكويت، وأقول لهم احنا مش عاوزين مساعدات، احنا عاوزين مستثمرين، وعلى رأي المثل الصيني لا تعطني سمكة ولكن علمني كيف اصيد، وعلى رأي المثل المصري: لا تعطني بيضة ولكن علمني كيف ابيض!! والعالم كله مجرد ما يشوف البلد هادية والأمن مستتب الاستثمارات حتيجي ترخ زي المطرة، وأول المستثمرين اللي عاوزهم يرجعوا هم صغار المستثمرين المصريين، لان دول اللي حيفتحوا مصانع ومزارع صغيرة تشغل الشباب،
- بالنسبة للسياحة؟
- مصر فيها نصف اثار العالم، وشواطئ ما فيش منها في العالم، وصحراء ومزارع وجبال ، وبعد كل ده دبي يبقى عندها سياحة اكثر من مصر (وتبع هذا التعليق بصوت يشبه الشخير مشهور به أبناء الاسكندرية)، صدقني اذا الامن استتب السياح حيرجعوا بالملايين، وبعدين العيال الصيع والبلطجية اللي يتلموا حوالين السياح يضايقوهم ويطفشوهم في عيشتهم دول ما فيش عندي ليهم غير المعتقلات
- كنت ذكرت تصريحات تقول فيها انك حتخلي مصر كلها تنام من المغرب، وأنك ناوي تطبق الشريعة، والناس بتقول انك بتعمل كده عشان تكسب أصوات الاخوان؟
- مين ابن اح...اللي قال لك كده؟ طبعا الناس ضروري تنام من المغرب عشان تصحى الصبح بدري تروح تزرع وتصنع وتشتغل زي البني أدمين ، البلد دي مش حتنهض واحنا سهرانين للصبح قدام التيليفزيون والنت، احنا متأخرين كثير عن ام العالم، ولو العالم بيشتغل ٤٠ ساعة في الأسبوع، يبقى احنا نشتغل ٦٠ ساعة في الأسبوع عشان نعوض اللي فاتنا، الانتاج والعمل هما الحل
- طيب انت ايه رأيك في منافسينك على الرياسة السيسي وحمدين صباحي
- احنا رايحين نلعب ماتش كورة، واللي حيكسب نقوله الف مبروك واللي يخسر نقوله هارد لك ، لكن اللي يقل أدبه ما فيش الا الجزمة القديمة
- طيب سؤال اخير، ممكن أخد السيديهاية بتاعتي؟
- نعم ياروح أمك!!
وانصرفت وانا مؤمن تماماً بان مرتضى منصور هو رجل المرحلة، وقطعا سوف أعطيه صوتي !!
samybehiri@aol.com
نقلا عن إيلاف
المقال الموضوع يعبر فقط عن رأي صاحبه وليس بالضرورة عن رأي أو اتجاه الموقع
جميع الحقوق محفوظة للأقباط متحدون © 2004 - 2011 www.copts-united.com