كاريزما مصريه ..

مينا واصف | 2014-05-25 08:42:40

مينا واصف
بمناسبة الانتخابات اللي البلد كلها تقريبا مستنياها بفارغ الصبر بيلفت نظري اوي تصرفات وكاريزمة الشعب تجاهها يعني تحس كده اننا في احتفاليه وجو كده جديد علينا خالص جو اول مره نعيشه وبعيد عن اي مرشح من المرشحين مع اننا لا يمكن ننكر الاتجاه العام جاي منين ورايح فين ..

المهم اول مره نحس بلدنا فرحانه بحاجه زي كده .. او لمره نشوف الامل في وشوش شبابنا وعواجيزنا كده مع احترام كل وجهات النظر والاختلاف مع العلم ان الاختلاف ده مهم جدا اذا كنا بنأمل في دوله ديمقراطيه مدنيه بنتمناها من زمن ..

الناس نازله المره دي تحتفل نازله شايفه امل .. شايفه حلم نفسها يتحقق .. ده شاب نفسه يتجوز
ونفسه في شقه و ده اب بيفكر يحقق لاولاده اللي معرفش يحققه لنفسه و دي ست كبيره تعبت من طوابير المعاش اللي اتهرست فيها وده راجل عجوز حارب زمان عشانها وعارف اد ايه قيمتها .. وده وده و ده ...

كلها احلام بسيطه كلها احلام اقل حاجه تقولها انها مشروعه في بلد ولادها تعبو اوي من اللي ماسكينها لكن نغسهم و بيدعولها من قلبهم .. ان كان شيخ ولا قسيس قرأن او انجيل بيعشقو بلدهم نفسهم يقدمولها و مستنيين منها .. مستنيين حد يراعي ربنا فيهم حد يطمنهم و يحببهم في بكره .. حد يكون امين عليهم .. حد مسئول عارف قيمة الصوت اللي هياخده .. بعيد عن كلام الشعارات اللي تعبنا منه بعيد عن جو الشله والعشيره وقلة القيمه .. مستنيين وعارفين ان اللي جاي راجل -بمعني الكلمه - وده حلمنا الناس نازله المره دي عشمانه وبتقول يارب ولانه شعب متدين بطبعه مستني

هدية ربه .. الهديه اللي بلدنا تستحقها كل واحد نزل من بيتهم وعارف انه ممكن ميرجعش بس عشان بيحبها كل واحد وواحده معلق صورة حد عزيز عليه اوي راح عشان خاطر ترابها .. نفسه وهو بيبصلها يقوله او يقولها شفت البلد بقت حلوه ازاي شفت انك مرحتش كده وخلاص .. شعبنا شعب طيب غلبان شعبنا عنده كاريزما مش علي حد تنبسط كده وانت بتشوفها وبتحسها ..

بتشوفها في عربية فول الصبح بدري .. بتشوفها في عسكري واقف في الشمس .. في ست شايله قفص عيش علي دماغها .. في كوز دره بتاكلو علي الكوبري وانت باصص للنيل .. بتشوف وهتشوف وهتفضل تشوف .. خلاصه الكلام .. سيادة الرئيس اللي جاي بص في وش ولادها هتلاقي نفسك عايز تقدم كتير وكتير اوي .. اتعب واحنا هنتعب معاك .. دي بلدنا مش شوية تراب ماشيين عليه لا دي حته مننا ....