فاصل ومش هنواصل

أماني موسى | 2010-03-26 00:00:00

بقلم: أماني موسى
في حياة كلاً منّا تلفزيون صغير في حجرته الصغيرة بمنزله الصغير يتفرج عليه في الوقت الصغير المتاح بعد يوم شاق من الجري والنط في المواصلات والشغل، وبينما هو يجلس محاولاً الترفيه عن نفسه ونسيان الهموم من حوله ويقلب بين القنوات ليجد مجموعة من الإعلانات يتخللها بعض الأفلام والمسلسلات!!
والحقيقية أنه بعد تقليب ولف ودوران بالقنوات لقى أنه مفيش فايدة وأسلم حل أنه يقفل التلفزيون ويبحلق في السقف لغاية ما ينعس، ودة ليه بقى لأنه حصل له ارتفاع ضغط الدم وزيادة بالسكر وانهيار عصبي من الإعلانات المستفزة، واللي بتتقسم لعدة أنواع... منها:

1- إعلانات طبقة الزبدة المغيبين عن الواقع الأليم:
وإليك عينة من أمثال تلك الإعلانات: عندك ألم في صباع رجلك الصغير ومسببلك صداع مستمر ومش عارف تكتب بيه كويس؟، عندك حاجب أعلى من الحاجب التاني ومسبب لك أزمة في شكلك؟، مناخيرك طويلة شوية ومفيش منديل بيكفيها؟، كرشك كبر بعد الجواز وأنتي عندك مشكلة في الأفخاذ وبتاع الشاورمة غُلب في تقطيعهم؟، لو عندك كل المشاكل دي متجمعة أتصل فورًا على الرقم الظاهر على الشاشة، بس تحذير ونصيحة من أخوك المسئول الإعلامي لأخي المواطن لو عندك كل الأعراض دي يفضل متتصلش لأن حالتك ميئوس منها ومفيش حل إلا الذهاب للترب يومين على التوازي وبعدها هتبقى زي الفل.
والنوع دة من الإعلانات مستفز للمواطن لأنه بيحكي في أمور تعد منتهى الرفاهية بالنسبة لمواطن مش لاقي كيلو لحمة لعياله أو دوا لحد مريض من أسرته وبالتالي محدش منهم هيفكر يغير مناخيره ولا شفايفه!!

2- إعلانات دينية بالخلطة السحرية:
- عندك ألم في ضهرك؟، شعرك بيقع؟؟ تعرفي إن الحجاب بيقوي شعرك مش بيضعفه؟، عندك ضعف في الذاكرة وضعف في الـ...... ومراتك شردت لك في المنطقة؟ اتصل فورًا وأحصل على منتج البر والتقوى من شركة الإيمان، والمنتج دة ثبت فاعليته علميًا ومهلبيًا لمعالجة كل الأمراض والأعراض.
ملحوظة: هذا المنتج لم يتم تجريبه واختباره من قبل وأنت أول حد نجرب عليه منتجنا،، ودة من غلاوتك عندنا.

نوع آخر بقى من الإعلانات الدينية:
- بتحلم أحلام مزعجة بمحصل النور والغاز والتليفون وكل الفواتير طابق على مراوحك عشان يحصّل فواتيره؟، دايمًا بتجيلك أشباح حماتك وهي بتعمل فيك مقالب فيلم "حماتي ملاك"؟، مش عارف تنام بالليل من كتر التفكير في همومك؟، بتجيلك كوابيس عن خناقاتك اليومية مع مراتك وهي رافعة عليك أبو وردة قدام العيال؟، بتشوف خيالات صاحب البيت وهو جاي ياخد الايجار المتأخر وبيهددك بالسجن والضرب على القفا؟، لو بتعاني من كل الحاجات دي اتصل فورًا وهيرد عليك الشيخ "مصباح مفتاح سراج" وهتلاقي عنده تفسير الحلم أو الكابوس، وفيه كمان إلى جانب تفسير الأحلام، تفصيل الأحلام، دة لو أنت عايز تفصل كم حلم ولا كابوس لمراتك ومديرك وحماتك ولا حاجة.

3- نوع ترفيهي متميز بقى من الإعلانات ومليان مووووز:
دي أشهرها طبعًا إعلان (أيوة كدة يا وديع أخيرًا فهمت، وأفلام عربي أم الأجنبي)..... ودي للترفيه عن الشعب وتسلية المواطن الغلبان بس بعدها يتزيد عنده جرعة (أنا عايز أطلق أنا متجوز غفير).

4 – نوع الفتي بكل حاجة:
عندك مشكلة قضائية؟، لالا بلاش دي، عندك طيب مشكلة نفسية وكاره نفسك؟، ولا أقلك بلاش دي كمان، بتواجه مشكلة في شعر صدرك ومش عارف تخليه زي نجم الجيل؟، بص بقى لو عندك مشكلة من أي نوع؟ أتصل على الرقم دة وهتلاقي الحل من كل نوع!!!!!!
بالنهاية بيجد المواطن نفسه بين كم هائل من الإعلانات اللي بيتخللها أفلام ومسلسلات ويقولوا بين كل إعلان والتاني عزيزي فاصل وابقى تعالى قابلني لو هنواصل.