عَبْــدُه عَبْــد رَبُّــه

عزمي إبراهيم | 2014-06-16 13:57:35

بقلم-عزمي إبراهيم
رُحــْـت أستخـرج بطــــاقة سألني: إسمك؟.. قلـت: عَبـْـدُه
قال: عَبـْـدُه إيـه؟.. قلـت: عَبـْـدُه عَبـْد رَبــُّه
قالـّي: الإسم بالكامل يا عـَم عَبـْـدُه
قلت: عَبـْدُه عَبـْد رَبــُّه عَبـْد الإلــَه
قال: واسم أمَّـك؟
قلتله: طبعاً إسمها الست أم عَبـْـدُه
وخالتي اسمها اخـت أم عَبـْـدُه
قالـّي: بلاش تريقة يا عم عبـده، وخُد السؤال اللي بعـْـدُه
عنوانـك وتاريخ ميـلادك يا عـَـم عَبـْـدُه
قـُلتهمله وراح كتبـهم في السِّجـِل عَنـْـدُه

سألني: دينـَـك؟.. قلـت: ديــني!!!؟
إيـه لازمتــه يكـون في البطـاقة!؟
حَنـْبـَـكة.. والا عَيــاقة!؟
قال لي: لازم بالقانون أحط دينـك في البطـاقة
قلت ديـني مكانه قـلبي
مش مكانه في البطـاقة
يعـني ديـني، يابن بلـدي، أمـر شخصي يخِصِّـني
ليه الحكومـة عايزة ديـني في البطـاقة؟ دِلـِّـني
والا اقـولـَّك
بلاش تقولـّي... انا حاقـولـَّك

بصراحة.. يابن بلـدي
بالعربي.. لا انجليـزي ولا لاونـدي
البــلاد "الخايبــة" تحشي في كل شـيء ديـني ودينـك
عشان تمَيِّـز في الحيـاة بيـني وبينـك
للتعَصُّب والخساسة
وحَشـر الديـن في السياسة
ديـني أمـر خـاص، بيـني وبيـن إلـَهي
لا دخل فيه للحكومة ولا للسفـارة ولا للمـلاهي
أمـْـر مش عايـز مناقشة أو خنـاقة
أمر مش عايـز تحايـل ولا تسجيـل في البطـاقة

في البـــلاد الحـُــرَّة اللي سَبـقـونـا بجـــدارة
فــَن وأدب وعلـوم وأخـلاق وسياسة واِدارة
نـَـوَّروا الكـون جميعه بالثقـافـة وبالحضارة
قادوا شـُعلات نـَوَّرت للكل، مش بس شمعة
من علـوم لهندسة لطـِب لاختراعات بروعة
الأديان عنـدهم أمر شخصي متروك للعبـادة
مش للتحَـكُّم والسيــادة
يا ريت الشـرق يفهم أسباب التقـدم والقيـادة
بدل ما يلطعـوا الديـن في الاستمارة
وفي الشهادات والطلبات وأوراق الإدارة
وفي الدسـتـور... وفي رُخَـص السواقـة
وطبعـاً بيزوَّقـوا بيه البطـاقـة
علشان تميِّـز بالديـانة بين مواطـن ومواطـن
الأمـر فيه المَكـر زي الشمـس بايـن

كرَّهونا ف بعضنـا وفرَّقـونـا
حَطموا وِحدتـنـا.. وحطمونـا
وخيـِّبوا بلادنـا خلـُّوها نايمة مكَعـوَره
متجمـِدة ومتأخـَّـرَه
بقينا في صَف الأمم.. واقفيـن.. أو قول قاعديـن ورا

نسيـنا حريــة وحضـارة
وقعـدنا في قعـر المغارة
هجـرنا أسـواق الثقــافة
ومسكنا أهـداب الهيــافة
متزمّتيـن، متشدديـن، متعقَّديـن
ماسكين سيوف.. وعمَّالين نمضغ في ديـن
بقينـا لو قولنا بنمشي... بنمشي... بس لـِـوَرَا!
وشعبنا لو قولنا عايـش... عايـش... بمُقْـدَره!
بقينا للأسـف
عايشين في نُقـرة أو في حُفـرة أو في طـاقة
وكل هَمِّـنا... نسجِّـل الديـــن في البطـاقة!!

بأقـول لك إيـه يا عـم يا بتـاع البطـاقة
بلـَّغ الأزهـر، بلـَّغ العَسكـَر، بلـَّغ المُحضَر
بلـَّغ الصُحْبة والإخـوان والقاضي والسجّـان
والترجمان والبرلمان وحُرَّاس الديـوان
بلغ كل اللي صُوتـك يطـولـُه
بلغ اللي انـا عايـز اقـولـُه
"أنـــا قبــــطي"
أنا قبــطي.. يعني مصـري
بالبطـاقة.. ومن غير البطـاقة
لو حَـد يسألني ما بانكـِرش ديـني
وولائي للوطـن راجـع لأخـلاقي وِديـني

بلـَّغـهم يشيـلوا من البطاقـة الديـن
وكل واحد حسابه عنـد ربُّـه يـوم الديـن
احنا مش على بـاب الجنـَّة.. يدَخَّـلوا ميـن، ويمنَعـوا ميـن
كلنـا أبنــــــــــاء وطـن
عمـره من عمـر الزمـن
مسلمين ومسيحيين... ونــاس تانيـين
كلنــا مواطنيـن.. متسـاوييـن
ودي بطـاقة... لإثبـات الهويـة
يتحَـط فيها فقـط.. "مصـري" أو "مصرية"
يا مؤمنيـن يا عادليـن
يا شجعان يا متنوريـن
قولـوا آميـن
وشيلـوا منـها الديـن
ومن الرقـم القـومي شيلوا (1) وشيلوا (2)
بلاش مَكـــر وحَـداقـة
وبلاش تلاعـب أو تآمـر بالبطاقة