يا ريس كله تمام

ميرفت عياد | 2010-05-14 00:00:00

بقلم: ميرفت عياد
يا ريس كله تمام والصحة عال العال.. لا فيه أكياس دم فاسدة.. ولا أمصال غير صالحة.. حتى الدم رفضنا أنه يكون صيني.. دة حتى من كتر صحة المواطنين المستشفيات فاضية.. والخدمة في التأمين الصحي عالية.. والأدوية من كترها أسعارها رخيصة.. أصل الشعب لا محتاج أدوية ضغط أو سكر لأنه عايش متنعم.. ولا محتاج أدوية فشل كلوي أو سرطان من كتر ما الحياة النظيفة والأكل الصحي.

يا ريس كله تمام كل المنتجات في بلادنا مكتوب عليها صنع في مصر.. وشبابنا فرص الشغل قدامهم من غير حصر.. يعنى لا محتاجين يسافروا لدول خليجية.. أو محتاجين هجرة غير شرعية.. وكمان منتجاتنا الزراعية بتكفينا ونصدر يعنى لا محتاجين هندسة وراثية.. ولا نحقن البطيخ بمية.. أما الثروة الحيوانية فيكفينا شرف إن مابقاش اكتر من الحيوانات في بلادنا.. علشان كده تمن اللحمة اتساوى بالطعمية ماهيه ديه الكباب الشعبي.. وبكده الشعب طول النهار قاعد على الفحم يتشوي قصدي يشوي وياكل.

يا ريس كله تمام الطرق والكباري فاضيه في عز الظهر لدرجة أنك ترمى الإبرة تسمع صوتها.. يعنى مافيش تلوث سمعي لا سمح الله.. وكما فين وفين على بال ما عربيه تمر.. يعنى لو حد حب يجيب البلد من شرقها لغربها يقدر في خمس دقايق بس.. أما المواصلات فخلينا لكل مواطن كرسين علشان يقعد ويمد رجليه ويفرد ظهره ويرتاح.. وكل دقيق بيمر أتوبيس يعنى مافيش حد واقف على الرصيف.. ومن كتر رفاهية المواصلات الناس ركنت العربيات بتاعتها في الجراجات اللي منتشرة في كل شارع..

يا ريس كله تمام طبق الكشري بخمسين قرش.. ورغيف العيش قطره نص متر معجون بمية الورد وحديد ورصاص وزلط واسمنت علشان صحة الشعب تبقى زى الفولاذ لا تتأثر بتلوث ميه أو هواء منين ما تسافر لأي دولة من الدول النامية بغرض السياحة.
يا ريس كله تمام قضينا على السحابة السوداء بعد عشر دقايق من وجودها مش عشر سنين لا سمح الله ولسة موجودة.. أما كوباية الميه بقيت أنظف من الصيني بعد غسيله.. وزودنا نسبة الكلور علشان ضمير الشعب الأسود يبيض.
يا ريس كله تمام الشعب هو المفترى كل وسائل الراحة والترفيه والصحة والسعادة والخير والجمال عنده ومش شبعان مش عارفين نعمله إيه تاني.
مش حقيقي يا ريس إن كله تمام.. أنت محتاج جنبك ولد همام.. زى طلعت زكريا في فيلم طباخ الريس.. يكشف لك إن الطبخ في البلد دي بقى على أعلى مستوى.