أهالي سوهاج: يستنكرون ترشح الوجوه القديمة في البرلمان

حسن عبد القادر | 2015-02-14 20:28:45

سوهاج - حسن عبدالقادر
عبّر عدد كبير من أهالي محافظة سوهاج، عن غضبهم واستياءهم، من غالبية المرشحين لانتخابات البرلمان على مستوى المحافظة، نظرًا لكون غالبيتهم من الوجوه القديمة التي دأبوا واعتادوا عليها كل برلمان.

وقال الحاج كمال أبو ضيف، من مدينة طما شمال المحافظة،:" مفيش جديد ، المرشحين همّا همّا، واحنا عارفين مين اللى هاياخدها وينجح مش معضلة يعنى، ومفيش حد عبيط ولا جاهل الأيام دى، وطالما إن المرشحين للانتخابات مااتغيروش يبقى برضو اللى هاينجحوا مش هايتغيروا".

وعبرت الحاجه سنية عن حزنها قائلة:" جات الحزينه تفرح مالقيتلهاش مطرح، انتخابات إيه بس، كل سنة انتخابات، وكل مرة بنشوف نفس الناس، يغيبوا يغيبوا ويطلعولنا وقت العوزة بتاعتهم، وتلاقى الواحد فيهم جاى وبيلف وبعد الانتخابات أدى وش الضيف، واحنا عارفين كل المرشحين كويس يعني دول زى دول، هما أصلاً داخلين المجلس عشان المنصب" .

وقال خالد عبد الحميد، مدرس، من مدينة جرجا جنوب المحافظة:" كنا نتمنى ان نرى وجوهًا جديدة قادرة على تلبية احلام المواطنين لكن للأسف المرشحون الحاليون والأقوياء يمثلون 70 % من الوجوه القديمة سواء سبق لهم وأن ترشحوا مستقلين او كانوا منتميين للحزب الوطنى المنحل، وغالبيتهم فوق سن الـ60 و الـ70 ، ولن يقدموا شيئًا لدوائرهم كما كانوا فى السابق أيضاً، ومعظمهم يترشح للبرلمان من أجل " الوجاهة الاجتماعية" أو لمصالح أخرى.

كان 161 مرشحًا فى محافظة سوهاج، تقدموا بأوراقهم للجنة العليا للانتخابات للترشح على عضوية البرلمان،فيما أعلنت مديرية الصحة عن وصول نتيجة تحاليل 70 من المرشحين الذين أجروا الكشف الطبي.