محتاج إليك

محبة مترى | 2015-06-14 16:12:12

محبة مترى
لما أجيلك يوم وأقولك
وأحنى راسى واعترف لك
محتااااج إليك.....................

محتاج إليك أناديك تجيلى
شايف أيديك بتناديلى
ياللى ف بعادى
نورى ودليلى

محتاج إليك متسيبش إيدى
محتاج إليك فرحى وعيدى
ياللى ف توهتى
قمرى وسبيلى

محتاج إليك ولا مرة خنت
وانا مش أمين ,الحب صنت
ياللى ف قساوتى
علىّ صبرت

محتاج اليك العمر فانى
زى سحابة مارة ف ثوانى
خلى اللى باقى
ليك اشتياقى

محتاج إليك حاسس بضعفى
فى هدب ثوبك القوة تشفى
ياللى بتحيى م الموت
أقمنى

محتاج إليك جاى بدموعى
أسقط وأقوم وأنده يسوعى
ياللى بحبك
توبتى ورجوعى

محتاج إليك وانت المعين
حافظ حياتى من سنين
ياللى أهديتنى الفرح
ولا سبتنى ليلة حزين

محتاج اليك فى البعد موت
والنبض يعلن صوت السكوت
ياللى بالدم اشتريتنى
أجلستنى فى الملكوت

محتاج اليك وانت راعىّ
بالحب ناظر دايما الىّ
ياللى من غيرك أتوه
أشكرك ربى وفادىّ

المقال الموضوع يعبر فقط عن رأي صاحبه وليس بالضرورة عن رأي أو اتجاه الموقع