لما الشيطان سكن عماره

فايز البهجوري | 2015-06-16 21:22:22

للشاعر فايز البهجورى
لما الشيطان سكن "عماره "    هجرها سكان العماره
مين اللى يقبل يجاور   " شيطان فى قلب عماره"
وكان قرارهم بقوّه        بهدم تلك العماره
وجابوا عاليها فى واطيها      قالشر ليس شطاره

*-----------------***-------------------*

اعرف حدودك
يللى انت بتناكف فى خلق الله
اتلم.. واعرف حدودك .. والتزم بيها.
وعيش حياتك .. على طريقتك .. وسيب غيرك.
يعيش حياته على طريقته . من غير دخول فيها.
يعيشها مؤمن .. يعيشها عاصى..
له رب شايف حياته ازاى يقضّيها.
ما لكش دعوه بعبادته ، واللا بصيامه
وللا بصلاته .. ازاى يصلّيها.
----------------------
لو كل واحد حيفرض طريقته   فى عبادته
على كل واحد غيره ، خالفه فيها
تبقى الحكاية ما هيّاش حكمه و تديّن ...
دى تبقى فوضى ولازم نصفّيها

*-----------------***-------------------*

رسالة   لكل تكفيري
يللى انت بتكفّر فى خلق الله.
هل الله اداك " توكيل" ، تتكلّم و باسم " الله " ؟
هل الله اداك " تفويض " بتكّفّر فى خلق الله ؟
مش ده برضه اسمه تدخّل
و تطاول على " ذات الله " ؟
-------------
هل من حقك تحكى وتفتى ،
فى حاجات انت ما تعرفهاش ؟؟
هل فى ايديك مفاتيح الجنّه.
تدخّل فيها الحاج " فلان " ...
علشان حط فى قورته زبيبه ؟

وتمنع منها " أبو علّان "
علشان دقنه ما طولهاش ؟؟؟

فوق يا أخينا من الأوهام .
واعرف حجمك بين الناس .
دا اللى بتعمله وحى شيطانى
وسوسه من شيطان خناس .

المقال الموضوع يعبر فقط عن رأي صاحبه وليس بالضرورة عن رأي أو اتجاه الموقع