"أبلة فاهيتا":"هامخمخ وأرجع لكم فى سيزون2 بمفاجآت تبهركو".."أنا بهرى ف الهم اللى يضحك

«إنتو بتسموا ده نجاح؟! دة مجرد تسخين.. وبعدين أنا عمرى ما عملت حاجة ومانجحتشى، أنا واحدة سمانتى حلوة وطول عمرى مرزقة.. والريادة الإعلامية دى برضك مسؤولية، وأنا مش حمل هم، أنا أحب الدندشة والفرفشة».. هكذا أجابت أبلة فاهيتا على تحولها من مليونيرة الويبة إلى مليونيرة التليفزيونة وفقا لإحصائية مركز «بصيرة» التى أكدت أن 8 ملايين مصرى يتابعون برنامج «أبله فاهيتا لايف من الدوبلكس» ليصبح برنامجها ثانى برنامج تصل مشاهداته إلى هذا الرقم بعد برنامج «البرنامج» الذى وصلت إلى 20 مليون مشاهد.


وعن مشاريعها المقبلة تقول الأبلة: «مشاريعى حطاهم عندى فى النيش، إيشى فوازير على أفلام على مسابقات على مش عارفة إيه مليان مليان.. بس أنا آخد أجازتى وأسمر سمانتى وأرجع لكو فى السيزون الجاى بحاجات تبهركو وتبهرنى».

وعن تعليلها لمشاهدة 8 ملايين مصرى لها قالت فاهيتا: «أكيد زهقانين.. هو فيه حاجة تتشاف.. هو الملل بعيد عنك.. حتى اللى مابيحبنيشى بيتفرج.. يمكن أكمن بقية الإعلاميين مركزين فى الهم اللى يبكى، وأنا بهرى فى اللهم اللى يضحك؟ الناس خلاص زهقت من الهم يا عمورى، وبعدين هو المشاهد يكره أرملة جميلة ، نغشة وناجحة.. قال مايتابعونيشى قال.. ده حتى أنا لو منهم كنت أتابعنى برضك.. وده غير إنى مأمنة نفسى بعمل من عند الشيخ الألوس دافناه تحت المسرح».


وعن عدم ظهورها فى موسم الصيف صرحت الأبلة: «الصيف يحب الخروج والسهر والسفريات، وأنا مش ناوية أضحى بكل ده وأقعد فى أرابيز شهوند وسمباطى، أدينى أريح أنا شوية وأتابع مسلسل صابرين.. وهناك بقى هامخمخ إزاى أرجع لكم فى سيزون تو.. مفاجآت.. أكيد مفاجآت». وفيما يخص شعار «للكبار فقط» والحديث عن كونه من عوامل نجاح «الدوبلكس» تقول الأبلة: «أكيد، وإلا ماكنتش عملته، أنا ضد المتوقع والأطفال ماعدا بودى حبيب قلب ماما».

الأبلة لها صولات وجولات مع الحكومة، وتقول: «هى الحكومة دى حاجة بتأثر فيها.. طول عمر الشعب المصرى يشتكى من الحكومة ومفيش حاجة بتتغير.. يدوبك عملنا ثورة ونص ورجعنا على طول، ولا كأن صوت الحرية كان بينادى، ومحلب يا عينى صعبان عليا، نيته كويسة.. بس النية مش كفاية.. أسعار البواريك فى الطالع.. الحكومة عايزة باترون تمشى عليه، شغل عزة سنجر اللى تلقط على السريع ده ماينفعشى.. عايزين حكومة عندها شوفة كده ورؤية، وأنا مسؤولى المفضل محافظ الإسكندرية، مش بس مز.. ده مز وكفاءة.. وأحب أقول لبقية المسؤولين اللى مش مزز، على الأقل خليكو أكفاء.. مش هيبقى موت وخراب ديار».

الأبلة فاهيتا لا ترى نفسها ممثلة للست المصرية، وتقول: «أنا ممثلة لنفسى، أرملة مكافحة، شاطحة ومختلفة.. الست المصرية فيها كتير منى.. وأشطر.. هى بس اللى مش عارفة.. الست دى لو بس قدرنا نحسسها بنفسها تبقى نافورة إنجازات.. أما عن ترشحى للبرطمان وكده فأنا أحب أطمن مرشحين سانت فاتيما ماتقلقوشى من منافستى السنة دى ، ماعنديش بطاقة، ولا ناوية اتجوز، أنا أرملة جديدة، ولسه اللقب ما زهقتش منه.

 

المقال الموضوع يعبر فقط عن رأي صاحبه وليس بالضرورة عن رأي أو اتجاه الموقع

جميع الحقوق محفوظة للأقباط متحدون © 2004 - 2011 www.copts-united.com