سطح الفساد ارتفع وحيتانه زادوا كتير

فايز البهجوري | 2015-09-30 09:12:19

الشاعر فايز البهجورى
فساد فساد فساد فساد        فساد انتشر وعمّ وساد
تبصّ يمينك تلاقى فساد      تبصّ شمالك تلاقى فساد
تبصّ وراءك تلاقى مزاد     تبارى فى قيادته "حيتان الفساد"
------------------***--------------------
تبصّ أمامك تلاقى ضباب .     تستّر وراؤه حماة الفساد
ورغم اختلافهم .. تلوّن شعارهم .. بطعم وريحة ولون الفساد .
وشيلنى وأشيلك .. وانهب وعبّى
    والهف .. وأخطف .. واجرى وخبّى
وما تنساش نصيبى .. وكله بحساب
وكله بوقته .. وكله جهاد .
--------------------***----------------------
وان قالوا "عجل " ، نقول احلبوه
ولو قالوا "ديك " حنقول " بيّضوه "
ولو حدّ عارض .. وقال الحقيقه
نشير " للتوابع" عشان يخرسوه
وهات يا " اشاعه "    وراها اشاعه
دا "واحد ضلالى .. وعميل معتوه "
وطالما لينا نصيب فى الغنيمه
فى داهيه " قانونهم " مع اللّى جابوه
----------------***-------------------
فيامن رغبتم فى نهضة بلدكم         تخلّو العدالة أساس البناء
وتبقى البداية لحرب الفساد         فى كل المواقع ، بكشف الغطاء
ويبقى " قانونكم " على الكل نافذ     كبيركم .. صغيركم .. أمامه سواء
والّلا ... والّلا ... والّلا ... والّلا.   أملكم فى نهضه حيذهب هباء