كلام بني آدم ومبدأ

| 2010-10-18 00:00:00

الراسل: ناردين عماد
"بني آدم"
تايهه في عالم غريب بدور عليك يا غالي، و لو أعرف مكانك يرتاح بالي.
أيام وجودك، كان الكل واضح ومكانش في فصال وكلام فارغ.
الحق كان باين مش كل واحد طايح .
من بعد ما سبناك والكل باظ واتحور .
قلوب الناس اتلونت من كل لون .
وكل شيئ كان مرفوض بقى وماله.
آه علينا يا زمن..
بس نقول ايه؟ ما احنا اللي غلطانين .
الغالي هو المبدأ واحنا اللي سبناه.
أكيد لو رجعت تاني الدنيا هتتغير تبقى انت عنوانها، وكمان تبقى عملها .
خليناك من الذكريات بعد ما كنت من الأساسيات .

"المبدأ"
ياه!! أخيرًا واحد بيدور عليَّ
أنا عملت فيكوا ايه علشان تسيبوني وكمان تنسوني؟؟
ما قولتولي سلام وبقى على الدنيا السلامة
أنا هنا موجود حواليكم.. بس مش ده مكاني أنا مكاني جواكم
عارفين حصلكوا ايه من ساعة ما سبتوني؟؟
بقيتوا حبة فوق و حبة تحت
بقيتوا مع كل حاجة تنفع وتضر
أكتركم اختار الوجع والمر ليه؟
كل واحد منكم بقى ليه دستوره، والكل بيضرب في بعضه.
انتوا قتلتوا القاضي بتاعكوا .
أتمنى انكم ترجعوني تاني جواكم ومبقاش كلام وخلاص.
لكن أبقى عمل في حياتكم.
أنا صحيح في اللغة العربية "اسم"، لكن عايز أكون في حياتكم انتم "فعل"

المبدأ:
خلوني صخر في حياتكم مش صلصال تشكلوه حسب الظروف