نقطــة ضعــــفى

محبة مترى | 2010-10-20 00:00:00

بقلم: محبة مترى
نقطة ضعفى هى سيجارة
مع دخانها مزاجى يعلى كما الطيارة
مذاقها ممتع معاها مبدع
وشغلى يطلع اخر مهارة
ولو رسموا لى ع العلبة بعبع
او باحس بروحى تطلع
ويومى كله براشيم ابلبع
ماقدرت اسيبها ولا بعدت عنها
ومهما قالوا فلوسك خسارة
ولو عشانها أبيع هدومى
بعد مابعت آخر عمارة .

نقطة ضعفى جلسة نت
فيها أدردش واللا أصاحب
واد او بنت
كل العالم هنا قدامى
من افريقيا لكندا ثوانى
وافضل اقلّب في الصفحات
من معلومة لسيل حكايات
عن فيضان واخبار مجاعات
والايميلات وحكاوى الشات
صرت مخصص ليها ساعات
والفيس بوك حكاياته حكاية
شبكة كبيرة ما ليها نهاية
وتاخدنى الصفحة ورا الصفحة
من فيديو لمقالة لبحث
واقضى حياتى كده على كرسى
قدام شاشة ايدى ع الماوس .

نقطة ضعفى جلسة لطيفة
مع اصحابى توحة وتيفا
اوعوا تقولوا شلة سوء
دول ناس راقية وآخر ذوق
كل القعدة حكاوى خفيفة
عن عنايات او طنط رئيفة
لما اتخانقوا خناقة سخيفة
وحكاوى من شرق ومن غرب
وأما سمعت فى شقة جارى
أصوات ضرب
وصريخ مع حركة عنيفة
هما اصحابى دول حريفة
وياهم الدنيا ظريفة
أوعوا تقولوا دى جلسة نّم
دول بكلامهم شالوا الهّم .

نقطة ضعفى فى شعور غيرة
وانى ألاقي غيري بيملك ثروة كبيرة
وأحس جنبه بالنقص
واتمنى لو اجيب له مقص
ياخد من حظه ويدينى
وياسلام لو منصب مرموق
واقّب ع الدنيا لفوق
هافضل عمرى كده فى القاع ؟
وقناعتى دى لابسها قناع ؟
انا مش باحسد ولا طماع
يمكن تيجى الفرصة واهاجر
ما انا مش قادر
اما اعيش زييهم اما اغادر .

نقطة ضعفى صعب أسامح
او لعدوى أمد له ايدى لما يصافح
غضبى يزيد لما يسئ
ويصير جوايا حصان جامح
قلبى الاسود بقى صوان
واعمل ايه اصل انا انسان
واللي بيغفر للى يسىء له يقولوا جبان
هانسى له غلطة اولى وتانية
اما التالتة هابيعه فى ثانية .

هى ياربى مش نقطة
بصراحة هى نقاط
والوضع لايمكن يسمح لى
خلاص بسكات
حاسس انى ضعيف من غيرك
مد لى ايدك
انا غرقان والموج عالى
وانت ياربى دمك غالى
بذلته عشانى وانا ما استاهل
كله اخدته كده بالساهل
خبينى فى حضنك وسامحنى
ودارى ضعفاتى
انت لوحدك بس بتسمع كل آهاتى
قوينى وادينى اعيش لك باقى حياتى.

المقال الموضوع يعبر فقط عن رأي صاحبه وليس بالضرورة عن رأي أو اتجاه الموقع