البساطة أول طريق الإبداع

بولا وجيه | 2016-02-04 09:33:09

بولا وجيه
الإبداع بشوفه دايماً في أنك تكون بسيط في العمل اللي بتقوم بيه لكن في نفس الوقت بتحاول تكون مختلف وأنك تكون فعلاً ممتلك لنوع خاص يميزك عن أي حد تاني بيكون معاك في نفس المجال يعني ببساطة في الأف الرسامين أشمعنا في كام فنان أو رسام بس اللي مشهورين من ضمن الألفات دي؟؟

ببساطة المبدع واللي بيحفر أسمه في التاريخ والناس بتفضل تفتكره طول العمر مهواش بطل خارق زي ما البعض بيتصور ؛لا خالص هو الفرق الوحيد أنه عرف قدراته أيه وأزاي يقدر يستغلها صح علشان يحقق اللي هو عاوزه.

يعني مثلاً مارينا عازر -مصممة الجرافيك- بالرغم أن في ناس كتير في نفس المجال لكن لما شوفت أعمالها أيقنت أنها فنانة بمعني الكلمة ويمكن كمان كلمة فنانة قليلة عليها.

اللي خلاني أقول كده لأن ببساطة مارينا بتحاول تبدع ومن غير تكون متكلفة أو عميقة في رسوماتها ؛بتحاول تخدم موضوع الرسمة بس مش غير عمق بزيادة فميتفهمش منها حاجة أو تكون بسيطة درجة السهولة ؛لا بتحاول تحقق معادلة السهل الممتنع.

والسهل الممتنع أنك تقدر توزن بين البساطة والأبداع فتطلع شئ من التميز سواء موسيقي ،قصيدة ،كتاب ،مقالة ،قصة .....إلخ.

يعني مثلاً ممكن تلاقي كُتاب كتير بيحاولوا يشخصوا الواقع اللي بيعشوه كل يوم في حياتهم مثلاً في قصيدة أو رواية أو قصة يعني مثلاً ممكن مشهد بداية المطر ؛ممكن تلاقي حد كتبها بأسلوب أجبرك أنك تقرأه وتحترم تجربته زي مثلاً كان قال "أغلب البدايات بتكون حلوة زي بداية المطر لأنها بتكون بداية لخير" فأنت أحترامتها واحترمت تجربته وقريتها لأن ببساطة وصلك معني حلو ومش متكلف في نفسه أو عمق.

عكس واحد تاني حصله نفس الموقف بس عبر عنه بمعاني عجيبة ومختلفة وقال مثلاً "مع بداية المطر تذكرتك عندما قطعتي قلبي إلي قطع صغيرة وتحولت عيني إلي سحب في شتاء أسود." وكأن الأخ متخيل نهايته طبق كبدة أسكندراني بالفلفل والسلطة في أول الجملة ثم النص التاني مال لصور عجيبة ومتتفهمش فتحس في أخرها أن يا هو اللي عميق بزيادة ياما أنت اللي حصلك حاجة في مخك ومش قادر تستوعب البرنس ده كان بيقول إيه.

ببساطة لو حابب تكون مميز شوف مواهبك أيه وأستغلها صح وأشتغل علي نفسك وحاول تكون مختلف عن أي حد سبقك ونجح في مجالك أو ناجح في مجالك ده دلوقتي لأن ببساطة لو عاوز تنجح شوف غيرك من الناجحين عمل أيه وقلده وهتنجح زيه لكن لو عاوز تكون مميز شوف غيرك عمل أيه وطور وأبتكر فيه وحتي لو نجاحك أتاخر أفتكر دايماً أن "لكل شئ تحت السموات وقت".