رباعيات من وحي القرش

أشرف فايز | 2010-12-14 00:00:00

بقلم : أشرف فايز

جاتكوا القرف جاتكوا المرض

ياشعب لازم ينقرض

صوتكوا اتخرس ف الإنتخاب

والقرش وحده اللي اعترض

.......

ف شرم قاعد متسلطن وناسي موضوع

شعبه اللي أصبح متسرطن وكبده موجوع

والشعب صابر على جوعه وعلى ذل سنين

والقرش وحده عمل ضده ... ثوره للجوع

..............

وادي الزمالك بقى حاله كرب ياولداه

مادد إيديه كده بينادي حسنه لله

ولا حد راضي يتبرع حتى بمليم

والأهلى بس اتبرعله بكام قرش معاه

......

القرش أثبت نظريه

ذكاؤه حاد ميه الميه

بس اسرائيل تديله عنواننا

يوصل لنا تحت الميه

......

فينك ياعم ادهم صبري*

ألا تدري فعلا أم تدري

إن الموساد بعتلنا قرش

يهبر ف سواحنا ويجري

*إدهم صبري بطل رواية رجل المستحي

المقال الموضوع يعبر فقط عن رأي صاحبه وليس بالضرورة عن رأي أو اتجاه الموقع