دم القبطي مش رخيص

د. صفوت روبيل بسطا | 2011-01-06 00:00:00

بقلم : د/صفوت روبيل بسطا

دم القبطي دُرً مش رخيص دمي القبطي حُرً مش حبيس

دم غالي قوي ونفيس فعل جبان قوي وخسيس

دمي يصرخ ويصيح وينادي وقلبي جريح

أقولهالك أنا صريح دمي من دم المسيح

دمي من دم العريس وروحي هيً العروس

دمي من دم القدوس فادي كل النفوس

دمي سال علي أرضي ده غالي قوي علي ربي

دمي سال علي خدي من عيني من جوا قلبي

دمي سال في بلدي فدا لبيتي وولدي

راح فين راح وطني زاد قوي زاد ألمي

الله يسمع صراخ دمي الله وحده المدافع عني

إليه وحده رايح همي لابد يوم ياخد حقي

دمي يصرخ للسماء من أرضي أرض الشقاء

من الظلم وطول العناء من الحقد وكُتر الجفاء

القبطي أصبح أشلاء وطار دم الشهداء

وصراخ أطفال أبرياء صعد لعنان السماء

أنا فدا كنيستي وفدا بيتي وعروستي

ودمي جاهز ,من نفسي أنول الشرف ,أفدي كنيستي

المسيح عريسي سباني من السما جه عشاني

بدمه الغالي فداني وإليه راجع تاني

أنا أستاهل ينزل دمي ويسيل مع دم ربي

ده شرف وكان أملي ومناي طول عمري

قوم يا قبطي قوم وراسك مرفوع قوم يا قبطي قوم, كفاية خنوع

قوم يا أبي قوم, قول للجموع خلاص أنا رايح, رايح ليسوع

بلاش تطفي يا أمي الشموع بلاش تقولي مافيش رجوع

دا أنا راجع راجع ليسوع كفاية ياأمي كفاية دموع

المقال الموضوع يعبر فقط عن رأي صاحبه وليس بالضرورة عن رأي أو اتجاه الموقع