الشعب مات

توماس بشاي | 2011-01-21 11:57:19

بقلم: توماس بشاي

يا ملك تعظيم سلام

سيادتك كله تمام

الشعب والشعب مات

والبلد البلد انتشر فيها السكات

ولا فيه ولاد ولا بنات

الشنق كان للي فكر في الكلام

والباقي شاف القلب خاف من كتر دقه قال ينام

والسجن كان للي ثار

والتف كان ع اللي غار

تعظيم سلام يا ملك كله تمام

مفيش فنون ولا مسارح

ولا كوميديا ولا جنون

ولا حكاوي ولا قهاوي

ولا شعر ولا أشعار

ولا سعر ولا أسعار

ولا هم ولا هموم

ولا دم ولا سموم

ولا عدو ولا حبيب

ولا هلال ولا صليب

ولا مظاهرة ولا هتاف

ولا محاكم واستئناف

واللي عاش يبقي خاف

تعظيم سلام يا ملك كله تمااام

خلاص مفيش غيرك انت و الحاشية

واللي عايش ف البلد لساه بيهتف.. للي جلد

نحن نحن .... الماشية

المقال الموضوع يعبر فقط عن رأي صاحبه وليس بالضرورة عن رأي أو اتجاه الموقع