مهرك يا حبيبتي يا مصر

| 2011-02-12 09:09:51

بقلم: إبراهيم إفرايم
يا تري ايه مقامك ؟ يا تري أيه مكانك ؟ يا تري أيه أوصافك ؟ أيه يا حبيبتي أيه ؟ أيه يعادل جمالك ؟ أيه يماثل حسنك و خصالك ؟ .. جمالك خاطف الأبصار حسنك فاق الأفكار ما في شاعر يوصفك بكلام و لا فنان يرسمك بفرشاة يعجز الكلام قدام جمالك يقف الفنان حائر قدام كمالك .. فوقتي يا حبيبتي كل الأوصاف و الكلمات ما في حروف توصفك و لا كلمات .
قدام الجمال دا أعمل أيه ؟ أدفع فيه مهر و لا اشتريه بأيه ؟ دا أنتي غالية عليا قوي و انتي جميلة جدا قوي عشان كدا مهرك عالي و غالي قوي .. ما عندي غير الدم الثمين أقدمه ليكي مهر و تعبير عن حبي الدفين دمي في سبيلك بيسيل أعمق و اطهر من مياه النيل .. صدقيني لغاية النهاردة علي أرضك لسه دمي بيجري دم أولادي اللي بيموتوا كل يوم من اجلي .

في سبيلك يا شعبي كله يهون بس عايز اقولك أن دم أولادي عليا مش بيهون انا عايز أنك تقبلي الدم مهرك علشان أجي أشفي أرضك و نهرك .. الدم ليكي علامة غفران الدم ليكي شفاء من أمراض و جهل ساكن من زمان أنا بقدم من قلبي مهري الدم اللي سال من جروحي و جنبي .. و أنا متعلق علي الصليب كنتي في قلبي يا مصر و من كتر وجعي كنت بتعصر عصر .
أنا جاي أقدم ليكي المهر صليب عشان أثبت ليكي ان ما في غيري حبيب عشانك اجتاز في سيول و لهيب عشانك احتملت البكا و النحيب عشانك اتحملت اللعنة و هروب الكل حتي القريب .. عشان اعطيكي كرامة حقيقية اتخليت عن الامجاد السماوية عشان اوصل ليكي رسالة الحب ولادي اتحملوا الاهانة وعاشوا جواكي زي ما يكونوا محبوسين جوا جُب .. الطريق لقلبك طويل لكن صبرني وجهك الجميل عشان اوصلك دوست علي أشواك لكن طول الطريق ما بطلت أهواك .

يا مصر يا عروستي يا حبيبتي ما اجملك يا بلد عشقتها و هويتها ما أروعك يا أرض ترابها في دمي ما أعظمك يا نيل شاهد علي حبي ما احكمك يا شعب أفديه بحياتي ما أكملك .. بحبك و عنادك ما يبدل حبي بحبك و جحودك ما يبطل اللي جوا قلبي بحبك و بعادك اللي طال ما يفقدني صبري بحبك و الظلم اللي جوا أرضك صار ما يبطل أمانتي .. ليه مش قادرة تصدقي أني انا هو ليه مش قادرة تقتنعي أن المتواضع هو هو ليه بتشكي في كلامي مع انه هو هو ليه بتكرهي الصليب مع أن الحب تجسد عليه هو هو .
أنا مصمم أني أخطبك لنفسي أصلك مش عارفة أنك مشتهي قلبي أنا عازم أجي أرضك أشفيها أنا عازم أزرعها و أنقيها من أرضك تخرج ثمار ثلاثون و ستون و مئة فوق التخيل و الانتظار .. يا مصر استعدي عريسك جاي يا مصر استعدي لعرسك اللي جاي الأرض كلها تشهد لزفافنا أنها ما شافت زيه و ساعتها تبدأ أمجادنا .. الأرض تضرب كف علي كف و الواحد يقول صاحبه أن عمره ما شاف زي كدا مهما راح و لا لف أنهض يا بلد قوم يا شعب أصحي يا نيل خلاص فجرك جه بعد ما طال الليل .

أنا مجدك يا مصر أنا عزك يا مصر أنا إلهك يا مصر اتزيني و اتكحلي و البسي استعدي للقائي يا مصر .. أنا عريس بس مش راكب عربية أنا جاي لك راكب علي سحابة مجد بهية أنا عريسك بس مش لابس بدلة و كرافتة شيك أنا لابس العزة ز الكرامة و المجد اهديك .. أنا مش ها أوعدك علي شقة أو فيلا أو قصر يطل علي النيل دا انا ها أسكنك الأمجاد اللي ما فيها احزان و لا موت و لا ليل أقبلي مهري يا مصر بحبك يا مصر

المقال الموضوع يعبر فقط عن رأي صاحبه وليس بالضرورة عن رأي أو اتجاه الموقع