يناير

هاني رمسيس | 2011-03-01 00:00:00

بقلم: هاني رمسيس
نادوا عليه كانون
سجّلوه فـ الشهادة يناير
عنونوا بيه الدروس
و ارسموه عـ الحيطان و عـ الأشاير
من سَمار الوشوش اطبعوه ، و اسمعوه
فى وجع الولادة هالّة بالبشاير
اكتبوا منه التاريخ .. حكاية وطن
تقولشى عاشق قلبه حاير
نحت الزمن اسمه
ضهره محنى و شبابه ثاير
نهك المرض جسمه
وطاويطه آمنة و حمامه طاير
حناجره مبحوحة و رقابه مدبوحة
بس الأمل كان فـ عروقه فاير
شخبط الرجال شخابيط العيال
عـ الورق .. فـ الهوا .. بين الزراير
طلعت الصورة لوطن جوه ميدان
و جنب منه نيل و صوته هادر
أسد و جندى و علم
و يد مارى ماسكة فى يد هاجر
عـ السمسمية بيرتلوا يناير
فارس و أبو زيده شاعر
: و انت ماشى فى الميدان
و راسك فى العلالى يا معجبانى داير
أوصيك تخلع مداسك أوعى تنسى
دا تحت رجلك دم سايل دم طاهر

المقال الموضوع يعبر فقط عن رأي صاحبه وليس بالضرورة عن رأي أو اتجاه الموقع