الله يرحم أيامك يا مبارك

رمزى بشارة | 2011-05-04 00:00:00

بقلم: رمزي بشارة
ماهو قالها حكمه فى كلامه
لو هاأمشى تلاقوهُم قاموا
من كُتر إللى شُفناه مِنهُم
ناقص نهتف فين أيَّامُه
...

وصحيح عصرك كان كمونى
وقنابل فينا بتفَرقَع
وعساكر بلا تُهمه خدونى
وإيدين فى أفايا بتطرقع

وفساد كان واصل للرُّكبه
عَبَارة وقَطر ودم رخيص
فقرا وحاجات سوده وصعبه
وده كله وخطَه للتوريث

بس الإخوان والسَّلَفِيين
من بعد مانارهُم لَسَعِتنا
قولنا الأهون منهم نارَك

يرحم أيامك يامبارك
ده جرى لنا أكتر ماجرى لك
وكإن المصريين ظلموك
وجَت الجماعات أخدت تارَك

العوا أنكَر إسلامها
وبرضو بيطالبوا بكاميليا
هَدِّدوا مَصر وسَرَقوا سلامها
شوفوا قنا وآبو قُرقاص فى المنيا

قالوا علينا كفره وخاينين
هَدُّوا كنيستنا إللى فـ أطفيح
قطعوا ودان القبطى المِسكين
دى مُجَرد أمثلة للتَوضيح

يعنى الإخوان والسَلَفيين
من بعد مانارهُم لَسَعِتنا
قولنا الأهون منهم نارَك

المقال الموضوع يعبر فقط عن رأي صاحبه وليس بالضرورة عن رأي أو اتجاه الموقع