اكبر يا شعب وفوق

شريف منصور | 2011-05-19 00:00:00

بقلم شريف منصور

بجد حاجة غريبة أناذ عمري ما شفت شعب غالبيته بيتصرف تصرفات في منتهي السذاجة مثل شعبنا المصري.
هو الشعب منتظر مين يخرجه من المصيبة اللي هو فيها ؟ و الظاهر ان المصيبة الأكبر ان غالبية الشعب مش حاسس انه في مصيبة.
حال البلد واقف و الاقتصاد أتخرب و الاقتصاد هنا يا اللي مش فاهم ومش عارف هو مصدر الرزق للبلد ولشعب البلد.
مش ممكن بلد بعد ما كبرت و بقت علي خلقتها شنب تروح لماما السعودية ولا بابا أمريكا تشحت المصروف. مش معقول بلد عندها كل الإمكانيات دي ومضيعة وقتها وطاقتها في سذاجة الهلال و الصليب . ايوه سذاجة مع كامل احترامي للهلال و الصليب. لا الهلال ساذج ولا الصليب ساذج ولكن شعبنا هو اللي شعب ساذج . الهلال رمز و الصليب رمز ولكن لا الهلال ولا الصليب حيروحوا الشغل ولا الهلال ولا الصليب هما اللي حيحافظوا علي مصر . اللي حيحافظ علي مصر هو شعب مصر اللي بيؤمن بأخلاقيات الهلال و الصليب . فلا الهلال ولا الصليب لهم نفع لو مكنتش أخلاقياتهم تشتغل في الشعب من أوله لأخره .

يا شعب انت عاوز تعيش عالة علي رب الهلال و رب الصليب ؟ من هنا و هنا واحد قالكم العمل عبادة و قالوا لكم العمل بلا أيمان و أيمان بلا عمل كلاهما ميت . يعني ايه ؟ ببساطة و بدون لف ولا دوران.
يعني تطبيق شريعة إلاسلامية و شعب مش مستعد من جوه أن يتعب بشرف يبقي مش حنشوف من الشريعة غير تقطيع الأيادي وقطع الرقاب و الأيمان بلا عمل يعني تواكل و سلبطه و كسل منتظرين بكل سذاجة معجزات تشتغل وتأكلنا و منتظرين معجزات توقف العاطلين المعطلين السلفيين يتركونا في حالنا. و العمل اللي بلا أيمان عمل مش في صالح مصر وشعب مصر. لازم نبني و نعمر مش نخرب وندمر. علي فكرة من غير ايمان بمصر اولا و اخيرا حيبقي الحرامية و اللصوص وقطاع الطريق بيروحوا الشغل علشان ينهبوا و يسرقوا و كأن مفيش حد تاني لازم يعيش غيرهم. .
يا فرحتنا لما السجون تتملي بالفاسدين ؟ يا تري انتم عارفين الفاسدين دول جم منين ؟ بسبب سلبيتك يا شعب وطلعوا بسببكم يا شعب . هو فيه مصري عايش في مصر ما تولدش في مصر ؟ عدونا لو دور علي حد يضرنا مش حيلاقي في الدنيا زينا.
يعني من أول حرامي لأخر حرامي و من أول لأخر سلفي أفاق ماهم برضة من نتاج شعب مصر. يعني مصيبتنا فينا ومن جوانا.
يا سيدي خليك متدين يا عمي يشرفنا تدينكم بس تدين بطول اللسان وطول اللحي مش عاوزين مهما نظفنا قيادتنا لازم ننضف افكارنا و ننقي تصرفاتنا .

ما الزبالة و الفساد مش بتطرحوا من نفسهم ؟ أحنا اللي صنعنا الزبالة وأهملنا و أحنا اللي خلناها تعفن أكثر وأكثر بكسلنا . أول عمن أول كنتم بتصقفوا لهم و بتقفوا علي الطريق تهتفوا لهم و بتكتبوا علي الحيطه الوليد بيقول نعم لمبارك قبل ما يخرج للدنيا .

يعني انتم فاكرين أنكم بكثرة مساجدكم ولا بكثرة كنايسكم حتوردوا علي جنة من غير تعب ومن غير عمل ومن غير آمن وأمان يعم علي البلد ؟

يعني نفسي أفهم الشيخ فلان ولا الشيخ علان بياكل منين و بيشرب منين هو و اللي وراه ؟ لا شغلة ولا مشغلة بس يجيوا في الهايفة ويتصدروا ... مش شايف غير شيوخ السلفية بس هم اللي بلطجية ؟ أقولك اهه هم البلطجية لانهم ميعرفوش غير لغة الذراع و كل همهم في النسوان و الجنس و المظهرية الدينية و نسيوا ان البني ادم لازم يشتغل ويراعي ضميرة في شغله و يأكل بعرق جبينه مش يكون عالة علي الغلابة و ماما السعودية اللي اكبر فرحه عندها تشوف مصر خرابه .
بصراحة صورة مخزية لشعب ساذج أهله مبسوطين بيسرحوه يشتغل ويطلع روح اهله ومن الملاليم يتمننوا عليه .
لا الهلال ولا الصليب ... مفيش حد حينفعكم غير عملكم وحبكم لبلدكم و وحبكم لبعضكم . اللي عاوز يتدين يدين في نفسه . عاوز يشتغل أهلا وسهلا عاوز يعيش محترم اهلا وسهلا عاوز يبني أهلا وسهلا . عاوز يتمسخر و يجري ورا دي اسلمت ودي اتنصرت وده لقي أعجاز هنا ولا ده لقي عجز هنا . يحلوا عنها ويفارقونا وفي أي مصيبة يروحوا ويريحونا. اكبر يا شعب وفوق من سذاجتك انت مش لسه عيل مستني المصروف.

اليابان خير شاهد ودليل... مصيبة وحطت عليهم دمرت بلدهم من فوقها لتحتها و في اقل من شهر شمروا عن سواعدهم وابتدوا يشتغلوا بجد. بعد كارثتهم طلعت أسهم شركاتهم و الناس بتجري تشارك في نجاحهم. أحنا فين منهم و أحنا لسة بندور علي الأعجاز و نترحم علي أيام سلف زمان. كأننا عايشين في ليالي ماضي الزمان و النهاردة وبكرة مجرد أوهام.

المقال الموضوع يعبر فقط عن رأي صاحبه وليس بالضرورة عن رأي أو اتجاه الموقع