المسيحيين الوحشين المعتصمين في ماسبيرو خطفوني

جورج فايق | 2011-05-20 00:00:00

بقلم :جورج فايق
طرقت باب البيت الذي تقيم فيه رعد الكائن بجمهورية أمبابة فتحت لي أمها عرفتها بنفسي معك جاسر من البوابة قالت أه أهلاً و سهلاً
- أهلاً بك ..فين رعد قالت لي مسكينة تعرضت لتجربة صعبة ربنا يكون في عونها عايزك تنشر الكارثة دي عايزين حق رعد يرجع تفضل
دخلت لأجد رعد جالسة على الأريكة ( الكنبة يعني لامؤخذة ) بتشرب كوب من الينسون الأصفر حتى تتمالك نفسها و تحكي حكايتها و دموعها نازلة كالمطر هدأت من روعها بقدر ما أستطعت و لكنني لم أتمكن من منع جسدها الجميل من الأرتجاف بل أن الرجفة أنتقلت إليا بعد قليل بعد سماع قصتها التي يشيب لها الجنين في بطن مامته
بدأت تحكي أغرب قصة سمعتها في حياتي و أنا عن نفسي أصدقها لأنها ليست لها مصلحة في الكذب و هل يكذب هذا الملاك البريء؟ جلست أم رعد معنا حتى لا تكون خلوة شرعية بيني و بين رعد رغم أن شكل رعد مثل أسمها يعلم أبليس الفضيلة و الشريعة.....

أوعى حد يقولي ما أنت لسة قايل عليها جميلة و ملاك يا عم أنا بكدب أنت مالك أسمع و أنت ساكت و أن كان عاجبك
قالت رعد بصوت ضعيف بعد أن أستعادت بعض هدوءها كان يوم 30 فبراير عيد ميلاد جدي الله يرحمه و نزلت أشتري له هدية فقلت لأختي أحسن حاجة أشتري لجدو مضرب بيسبول عشان المضرب اللي بيلعب به في النادي مش قد كدة سئلت و عرفت أنه أحسن واحد بيبيع مضارب بيسبول في ماسبيرو خلف مبنى الأذاعة و التلفزيون نزلت أنا و أختي و بنت خالت أختي كانت الساعة 10 مساء عشان نرجع بدري لأن أخرنا في البيت 3 صباحاً أصلنا من عايلة محافظة تصدق أختي قبل كدة رجعت 3.15 بابي قال لها روحي نامي مكان متأخرتي سئلتها و عملت أى ؟ قالت و لا حاجة قالت قشطة و مشيت و بقيت كل ما تعوز تبات برة تتأخر عن 3 صباحاً
قلت لها مش موضوعنا كملي
- رحنا ماسبيرو لاقينا في مظاهرة افتكرناها بتاعت الناس الحلوين بتوع لازم حسني يمشي فقلنا نروح معهم شوية و بعدين نشتري مضرب البيسبول ونرجع البيت لكن تصدق مطلعوش الحلوين بتوع حسني لازم يمشي أنما طلعوا الوحشين اللي زعلانين عشان كنيسة أتهدت بالغلط و كان رفعين صلبان و كتب أفتكرتها قرآن لكنها طلعت الأنجيل بتاعهم و راح مسكوا فينا عشان نمشي معاهم في المظاهرة و أحنا رفضنا و فجأة الجيش ضرب بمب مسيل للدموع قلت لها يا رعد أسمها قنابل و الجيش مضربش قنابل مسيلة للدموع على المسيحيين في أعتصامهم و كل اللي حصل أنه في أخر يوم بعد أن أتفقوا على فك الأعتصام في الصباح الجيش فرقهم في الفجر يعني 4 صباحاً بالقوة و مكتش الساعة 10 زي ما بتقولي و بعدين أزاي كان يوم 30 فبراير شهر فبراير 28 يوم بس
رعد تتعصب و ترمي كوب اليونسون من يدها هو يعني بكدب و حياة طنط كيكي هو ده اللي حصل
تتدخل أمها لتهدئتها خلص يا رعد متزعليش نفسك و تقولي يا أستاذ ما دام حلفت بطنط كيكي تبقى صادقة
- خلاص مصدقك يا رعد كملي
- بعد ما الجيش ضرب القنابل الدخان ملا المكان و سد أنفي و عيني و أغمن عليا لأنني رقيقة جداً و يغمن عليا من أقل حاجة و صحيت لاقيت نفسي محبوسة في أوضة كبيرة ومفيش فيها سيراميك لا الجوهرة و لا كليوباترا و لا حتى الأمير و كان معايا بنتين تاني و كان رابطينا من أيدينا و سدوا ودانا بقطن عشان منسمعش وجابوا مقصات و خلعونا لبحجاب و قصوا شعرنا
- سئلتها الناس دول كانوا لابسين أى؟

- قالت كانوا لابسين ريش و شباشب حمام زي اللي بيلبسوها بتوع الجيش قلت لها يعني هم كانوا جيش قالت لا شكلهم كان مسيحيين عينهم و شعرهم و شنابهم شبه المسيحيين بالزبط قلت لها مش يمكن هنود حمر مش بتقولي كانوا لابسين ريش قالت رعد بتأكيد لا هم مسيحيين حتى ريشهم كان ريش مسيحي و كان معلقين صور لمريم و الناس دي
- لا يبقى عدك حق مسيحيين كملي
- و دخلت ست عجوزة ماسكة عصاية هوكي في أيدها فافتكرت مضرب البيسبول بتاع جدو و قعدت أعيط فراح واحد منهم جاب ريشة و حطها في عيني و قال لي أسكتي و راح جابوا كتاب ترانيم بتاعهم و عايزنا نقول بالعافية - رحت أنا قلت أه هم خطفوكم عشان عرفوا أن صوتكم حلو عشان ترنموا ليهم شوية بس هم عرفوا زاي أن صوتكم حلو ؟ أه دول أكيد مراقبينكم من فترة و لا هم بميعرفوش يقروا عشان كدة خطفوكم تقروا لهم ربع ترانيم مشكل من كتاب الترانيم بتاعهم كملي يا رعد
- قالت رعد طبعاً رفضا نقرأ في كتابهم و راحوا جابوا مسامير عشان يرسموا لنا صلبان على أيدنا كان في بنات تاني غيرنا حاولوا يرسموه لهم صلبان نزفوا و شكلهم ماتوا و معرفش راحوا فين يمكن طبخوهم و كلوهم أما أحنا فرسموا لنا الصلبان على ظهر أيدنا و كنا مربوطين 3 أيام بل أكل أو شرب أو حتى حمام كنا بنعمل على نفسنا كانت ريحتنا تقرف
حاسيت أني قرفت منها قلت لها كفاية يا رعد أي العذاب الفظيع ده و بعدين يا رعد
- الست اللي كانت ماسكة عصاية الهوكي قالت احنا نمشيهم لما الليل يحل عشان ميعرفوش الطريق
- قلت لها يا رعد سمعت أزاي مش كانوا حاطين قطن في ودانكم ؟
- قالت رعد لا ما أنا بقرأ كلام الشفايف
- شاطرة يا رعد كملي
- لم الليل حل جابوا توك توك و وضعونا فيه و رمونا على الطريق الدائري انا شلت القطن من وداني بسرعة لكن لم ألحق أخد رقم التوك توك لكن فاكرة شكل السواق كان ليه شنب و أحول و من شنبه و حوله واضح قوي أنه مسيحي
- كان لون التوك توك أى ؟
- كان أبيض
- تفتكري نادي الزمالك له دخل في الموضوع ؟

- لا دول شكلهم مسيحيين
- كملي
- أنا قلت خلاص أحنا أنتهنا لكن لاقيت عربية جاية شاورت لها وقف صاحبها ٍو أنا ركبت لكن البنات اللي معايا خافوا و رفضوا يركبوا معي و حاولت أقنعهم ان السواق شكله مسلم و كويس ده باين من شنبه برضه لكنهم رفضوا و ركبت أنا فقط معه لكن الرجل رفض ان يوصلني لغاية البيت و أعطاني 50 جنيه وأوصلني إلى محل مضارب البيسبول و أشترت واحد لجدو و اتصلت بمامي جأت أخذتني
وتصف الأم أصعب 3 أيام من غير أبنتها رعد و لم تكن تعرف أن بنتها خطفها المسيحيين الوحشين بتوع ماسبيرو و تقول لقد مرت علينا الأيام صعبة حتى عيد ميلاد بابي مر كانه كابوس لا طعم للجاتوه أو البيبسي و لا حتى البيرة بحثنا عها في كل مكان و ابلغنا الشرطة و الجيش و لم نعثر عليها و بعد أن رجعت رعد وعرفنا أن المسيحيين الوحشين المعتصمين في ماسبيرو هم اللي خطفوها بلغنا الجيش و الشرطة و لم يستجب لنا أحد لنا الرجاء الأهتمام بدل ما رجالة العايلة يتهوروا و يروحوا يولعوا في الكنيسة و نقعد نقول فتنة و مش فتنة
اسأل رعد سؤال مهم :- المسيحيين اللي في ماسبيرو مصلحتهم أى في خطفك ؟ تقول عشان يرسم صلبان على ايدنا و يقصوا شعرنا ويخلونا نرنم الترتنيم بتاعتهم
قلت لها أه

هم رسموا صلبان على أيدكم عشان يغشوا و يزودوا عددهم لأنهم هيطلبوا بعد كدة بتعداد للمسيحيين اللي في صليب في أيدهم
ولكن قصوا شعركم عشان أى ؟ أه ممكن كانوا عايزين يفتحوا كوافير فخطفوك أنت و البنات عشان يدربوا في شعركم
أو يمكن خطفوك لأن صوتك حلو عشان ترنمي لهم شوية ما تسمعينا حاجة بصوتك الجميل يا رعد بس طبعاً أغنية حلوة مش الترانيم الوحشة بتاعتهم
تضحك رغد و تبدأ تغني أغنية كداب يا خيشة فأصرخ فيها حرام كافية
تقول أم رعد اللي خطف بنتي لازم يتعاقب سواء كان مسلم أو مسيحي أو هندي
أرد انا بيني و بين نفسي كانوا مريحينك منها ده بنتك لا صوت و لا صورة
وحياة طنط كيكي خطفها أحسن من رجوعها و اللي خطفها هو الخاسران
سؤال واحد أتكسفت أسأله مين طنط كيكي دي ؟
و إلى اللقاء في كدبة أخرى من كذب البوابة

المقال الموضوع يعبر فقط عن رأي صاحبه وليس بالضرورة عن رأي أو اتجاه الموقع