قصيدة "عظيمة يا مصر"

| 2011-05-30 00:00:00

الراسل: مينا سامي

عظيمة يا مصر
ظالمة عصري وكل عصر
فيلسوف متغرب في عشه
ومرتشي بيبرطع في قصر

يا أرض النعم
عظيمة يا أرض النعـــم
فيكي حد مبيقولش نعم؟
أنا! أنا بقول لااااااااااااااا
لالالا أنا برضه بقول نعـم

يا بحر الكرم
يا أبخل أم كرمك انصــــرم
في عز الشباب صار الشاب هـرم
وأنا بدور على الاحترام وعساكــرك
بيكرموا الحشاشين ويضربوا المحترم

يا مهد الحضارة
نايمين في الشوارع ع الحجارة
أولادك يا ميت خسارة
يعرفوا بس عن خوفـــــو
أن شارعه مركز دعارة

نيلك مسكر
لقيت لما جيت أفكر
نيلك مش مسكر وجوك معكر
وكل بتوع الأغاني كدابيـــــن
والمنافق هو اللي فيكي يشكـر

بدرك منور
الحكومة بتحاول تطــوَّر
السحل مضمون والضرب- لو عوَّر
مفيش فيكي عاقل يناقـــــــــــش
حتى المسئول يكدب ويحــوَّر

أرض الكنايس
سنين في محاولات حثيثة
أعمال ظاهرة وجهود خافية خبيثة
ونفوس حبيسة وكل دا عشــــان
ناخد تصريح بنا كنيسة

أرض الجوامع
الراهب تقشف وهرب من المطامع
والمتصوف بيصلي ولربه سامـــــع
ده مسيحي ودا مسلم بيعبدوا الرب
وهو الرب عنده مانـــع؟؟؟

أرض الجناين
جناين ومزارع ومدايــــــــــــــن
فين حد شايف حد عايـــــــــن؟
بتخدعوا نفسكوا وبتكدبـــــــــوا
وف الآخر قلمي فاسد وأنا خاين

عشتى يا مصر
يا بلدي يا مصر تعيشي
أو تموتي. طالما عدل مفيــــــــش
ولا أمان! دا أنا هربان من جيشي
وبتهان عشان بالحلال أكل عيشي

إلهي يصونك
إلهي يصونك من المحتليــــــن
المصريين اللي لخيرك ناهبين
هو إحنا ولاد كلب يا مصــر؟
لو إنتي أمي إديني حق البنين

أرض العبور
حاربنا وعبرنا وكسبنا إسرائيــــــل
وحكمنا وشكمنا ومسكنا عزرائيـــل
والحرب مخلصتشي وعن قرب حرب
طالما في فرق بين محمد وميخائيـــل

ويملى ربوعك محبة ونور
يا مصر يا بلد النور والإنارة
تتجوزيني يا بت يا شطـارة؟
واتجوزتها ولقيتها من زمــن
تلاتين سنة فاقدة البكـــارة

خمايل زهور
مش فاكر آخر مرة مسكــــت وردة
بس فاكر فكرت نفسي مرة شاردة
ليه الغابة طاردة والأسد معصوم
أحكامه فاسدة تصاريحه باردة

بهجة وسعادة ومغنى ونغم
منين البهجة وسط الغــلا؟
والسعادة في بيت صفيح في الخلا؟
وأغني غصب عني اللحن والنغــــم!
وبالمصايب قلبي ابتلـى؟

عظيمه يا مصر
عظيمه يا مصـــر
ظلملك ماله حصـــــــر
إزاي ينام ابن في صفيح
والتاني في قصـــــــــر؟
إزاي؟ إزاي يا مصـــر؟