حكِّم عقلك!

| 2011-06-14 00:00:00

حكِّم عقلك..
عايز تخرج في التحرير، جمد قلبك اجري وطير.
روح اتظاهِر، زعّق واصرخ، اطلب حقك، فرغ قلبك، وانشر فكرك...
بس يا صاحبي حكِّم عقلك. لو أنت رايح بس تشارك، اسمع وافهم إيه بيتقال
علشان في حيتان وغيلان، ومفيش مانع من التعابين، اللي بتنشر فكر يهين؟؟؟ وانت لكن عايز إيه..
آه افتكرت، عايز تحرَّر في فلسطين؟ دا أنت عيشتك زي الطين
وياريت الطين يا حبيبيي ده مروي، ده أنشف من طين فلسطين...

حكِّم عقلك..
قبل ما تعقد مؤتمرات، وتصالح أولاد عرفات، صالح شعبك على الأقباط
اللي خلاص جلهم إحباط..
ولا قاعدين تقولوا مواطنة ووحدة وطنية، وناسيين الاضطهادات العلنية
حرق كنايس خطف بنات
ولا دي أفلام هندية؟؟
لازم نفكًَّر وبجدية ونطفي الفتنة الطائفية
وياريت بس بسرعة شوية
ولا نقول المرة الجاية ونشوف الحرب الأهلية؟
والنسيج يتشق اتنين و"حنا" يسيب حضن "حسين"؟..
وأنت يا شيخنا ياللي هناك، بتحاسب في جيران وإخوات، وتكفَّر فيهم وتدينهم
دا أنت كمان من الحق حارمهم
مين قالك إن أنت إله، وتحاسب في عباد الله؟
فيه الرب الواحد بيحاسب يدي عقابه اللي يناسب
وبرغم أسوتك بيحبك، وأنت لسا ماشي في عِندك..
دة أنت يا راجل قلبك قاسي، ومعيِّش غيرك في مآسي
سيب ربك هو يدبرها، أكيد عنده حل لمشاكلها
سيبه يدبر حالي وحالك، هو ها يرسم لينا طريق
ونحضن بعض في فرح وضيق
خلي الحب يكون منهجنا، ومع بعض نطفي في نار الفتنة