صابونة لكل مواطن!

أماني موسى | 2011-06-16 00:00:00

بقلم: أماني موسى

بسم الله الرحمن الرحيم
بيان رقم 1 من رئيسة الجمهورية القادمة بإذن الله تعالى
في البداية أحب أرحب بيكم يا شعبي المصري العظيم –ها ركز معايا يا عظيم يا بن العظيمة يا قديم يا بن القديمة- أقصد في حضارتك وتاريخك طبعًا، بلاش سوء النية دة، وأود أن أوضح ليكم ملحوظة مهمة من شوية ملاحيظ كتير:
أولهم: إني لم أكن أنتوي الترشح لفترة رئاسة قادمة ولا هرشح ابني و دة وعد، ولكني قررت إذ فجاءة أني أرشح نفسي. وعليه أناشدك عزيزي المواطن ابن الدايرة انتخبني أرجوك انتخبني أنا هدفي مصلحتك أولاً ومصلحتي طبعًا يا روح أمك.
ومش هوعدكوا بشقق وشغل وجواز وكل الأحلام الهلامية دي لأنها خلاص بقت أحلام مستهلكة ومبقتش تخيل عليكوا، وبرنامجي الانتخابي شعاره "لسنا الأولون ولكننا متميزون .. فنحن نختلف عن الآخرون".

وأول حاجة في برنامجي الانتخابي هي صابونة لكل مواطن، ودة لأن الدراسات والأبحاث اللي أجريت مؤخرًا أكدت أن الشعب المصري العظيم في أمس الحاجة للصابون واستخداماته وأولها الحموم ، عارف طبعًا متسمعش عنه إلا في الأعياد لكن أنا هخليه سلو بلدنا، عشان تبقى منتعش كدة يا مواطن وريحتك حلوة ، وعشان تقدر قيمة اقتراحي وتعرف أد إيه أنا همي مصلحتك أركب أي وسيلة مواصلات تعجبك ويا حبذا لو الساعة تلاتة الضهر وساعتها هتدرك الفرق اللي هيحصل، دي هتبقى طفرة تحول يا راجل!!
وعليه هلغي كل جمعيات حقوق الإنسان واستبدلها بجمعيات حموم الإنسان.

خد عندك كمان من أهم فوايد الصابون الزحقلة، حيث إن أي حد مضايقك تزحقله حتى لو أنا شخصيًا، تقدر ترّغي الكرسي فتتم عملية الزحقلة من على كرسي الرئاسة بسهولة ويسر ومن ثم إمكانية التحول لكرسي بعجل!!
وبما إن الريحة بقت حلوة مينفعش يكون فيه أي أثر لعفن الفطريات والطفيليات، وعليه هكمل حملة النضافة من خلال توزيع أدوات حلاقة وأمواس "واخد بالك أنت وفاهمني"!!

بعد ما انتهيت من الخطوة الأولى في برنامجي الانتخابي ندخل على الخطوة التانية والأخيرة وهي جزمة لكل مواطن، أيون حيث إن العلم الحديث أثبت إن الإنسان أصله جزمة وبما إن المواطن إنسان هيبقى إيه غير مواطن جزمة؟! والجزمة هتنفع لاستخدامات عديدة ولكل الأعمار، فتلاقي كل مواطن حافي يلقى اللي ينفعه يوم لا ينفع المال ولا البنون (اللي هو يوم المطرة طبعًا).

إضافة إلى الاستخدامات المتعددة للجزمة منها أنك تضرب بيها اللي خانقك أو تحدفها في ضربة حرة مباشرة على مراتك أو جوزك، أو في ضربة ركنية على حد من عيالك بعد ما تلزقه كدة في ركن من الحيطة.
وخد بالك الجزمة دي دوارة يوم معاك ويوم عليك وعلى نفوخ اللي يتشدد لك، يعني هتضرب وهتتضرب ، حكم أنا أحب العدل والمساواة وعليه هضربكوا بيها كلكوا في مساواة وإخاء دون تفريق أو تمييز.
وبانتظار اقتراحاتكوا وأحلامكوا عشان أحطها على برنامجي الانتخابي