حزلئوم الرئيس - الجزء الثالث

مايكل فارس | 2011-06-16 23:35:05

بقلم: مايكل فارس

قانون منع الاحتكار وقانون منع استخدام الايد اليمين
هكمل معاكم شعبي العزيز الطيب المهاود الحنيين أبو قلب كبير الرهيف أوي، بعض القوانين اللي بحاول أطبقها لخدمتكم تبعًا.. هدلعكو وهشخلعكو.. هدلعكو تدليع وهشخلعكو شخليع وهفرحكوا تفريح واسعدكم تسعيد وهروقكم ترويق.. وكفاية كده.

القوانين اللي بقترحها عليكن النهردز كانون منع الاحتكار وكانون منع استخدام الإيد اليمين.

أولًا كانون "منع الاحتكار".. يعني إيه؟ حد غني يحتكر حد فقير ولا يعني إيه؟ حد مسئول يحتكر حد محدود الدخل ولا معدوم؟.. ولا يعني سواق مكروباص يحتكر الركاب ويشتمهم كمان؟ ولا اللي بيلم الأجرة يحتكر الستات والرجالة في الميركوباسات. ونص الكانون "محدش يحتكر حاجة ولاحد يحتكر حد تاني أو ثالث.. وعكوبة الكانون "اللي هيتمسك بيحتكر حاجة ولا حد هيطلع عين أهله".

تفسير الجملة الأخيرة استشرت فيه بعض المتخصصين ولثه ومستكريتش على حاجة بعينها (أو ودانها)، في ناس بتقول نمسك المحتكر اللي احتكر ونرفع شعار (مَن احتكر يُحتكر).. ونقعد نشتم فيه لحد أما يعيط.. وناس تانيين بيقولوا نمسك المحتكر ونقطع "الحتة المدلدلة دي اللي في ودنه". سألت المستشارين: هما ودنين يمين وشمال، وأكيد هيبقي في حتتين متدلدلتين (أو متدلدلتان.. الصراحة معرفش المثني بتاع المدلدلة إيه)، فقالولي هنقطع الحتة المدلدلة اللي في الودن اليمين، سألتهم ليه يا جدعان اشمعزه اليمين؟ والشمال كخة؟.. قالولي أصل إحنا لما ندخل بيت ولا مكان جديد بنخطي برجلنا اليمين، وإحنا بنتفائل بيها، ولما بناكل برضه بإدينا اليمين ولما بنشتغل برضه بإدينا اليمين. قلتلهم.. تــــــيــــب يعني كله يمين يمين.. مفيش مرة شمال.. خلاص يعني خصمنا الشمال.. الشمال كخة... تب لا هنغير الكاعدة ونخليها شمال وهنقعطع الحتة المدلدلة في الودن الشمال وهعمل كانون جديد اسمه "منع استخدام الإيد اليمين للمصريين"، وكل حد هياكل هياكل بالشمال، ولما ييجي شاب ولا شابة ولا راجل ولا ست ولا طفل ولا طفلة يدخل مكان خاصة الشقق هيدخل بالشمال، وياويلوز وسمار ليلوز لأي حد هيخالف الكانون.. سألوني هتعمل إيه؟ قلتلهم: عند بقى هقطع الإيد اليمين..

سألتهم: هل في ربط بين استخدام شعوب الشرق الأوسط كلها الإيد اليمين وبين تخلفهم؟ وبين استخدام الغرب وأوروبا والدول المتقدمة لإيدهم الشمال وتقدمهم ونهضتهم؟ خاصة إن كل اللي حققوه كان خيااااااااااال واسع ولكنة حصل.. معرفوش يجاوبوا (مستشاريين يوجعوا القلب). قلتلهم على نظرية أثبتتها الأبحاث العلمية إن الإيد اليمين مرتبطة بالفص الشمال في المخ اللي مسئول عن الحسابات والمنطق، والإيد الشمال مرتبطة بالفص الأيمن في المخ المرتبط بالخيال والإبداع، يعنى الجماعة الأجانب لما نشوف أفلامهم الرهيبة في الخيال العلمي تحديدًا نستغرب من كم الإبداع في الإخراج والمونتاج والموسيقي و و و، ولما نشوف اختراعاتهم نستغرب إزاي أبدعوا ده.. ده علشان الإيد الشمال..

أما إحنا آخرنا الإيد اليمين، وعشان كده مربوطة بالفص الشمال بالمخ المسئول عن المنطق والحساب بس، يعني آخرنا نحسب واحد زائد واحد يساوي كام.. ما نعرفش نتخيل ولا نبدع.

لذا قرَّرت تطبيق النموذج الغربي في تطبيق "الإيد الشمال في الاستخدام" علشان نبدع ونتخيل ونبقي متقدمين بقى.. لو تخيلنا مثلًا العلاقة بين المسلمين والمسيحيين هتكون إزاي حلوة من غير تعصب، أكيد هنحاول نطبق ده بس مشكلتنا مش عارفين نتخيل، بنبص إما ورا أو تحت رجلينا (وعندي احساس لو عرفنا نتخيل مش هنعوذ نطبق مش عارف ليه). ده إحنا شعب غريب غربنة، وعجيب عجبنة، وفظيع فظعنة، ولئيم لئمنة، ومتعصب عصبنة.. بس هوعدكم كله هيتغير.