هيييييييييييه مسكنا جاسوس

| 2011-06-19 12:23:01

(من الشعر الحلمنتيشي)
الراسل: ماهر دانيال
تمام يا فندم مسكنا جاسوس
يالا عليه بالجزمة ندوس
والليلادي يكون محبوس
طب هنسيب قتال القتلة
طبعًا سيبوه ده ابن بلدنا
بس ده ولَّع في كنيستين
مش مهم يا عم حسين
ابن بلدنا نسامحه وماله
أما يهودي نطلع عينه
ده بينقل أخبارنا لبرة
أخبار إيه يا سعادة البيه
أخبار الثورة المصرية
طب ما العالم كله عارفها
وعلى القنوات الكل شايفها
اسمع وافهم يا شاويش حسين
لما نقول يهودي خاربها
شعبك يفرح بيك ويزيط
أصل الشعب المصري ده فاضي
يفرح لما تقوله يهودي
بس الشعب يا باشا اتغير
وإحنا غلبنا معاه وتعبنا
بس وهي ده فرصتنا
ونرجع للشعب هيبتنا
بس ايلان ده يا باشا حويط
ايلان مين يا عم حسين
الجاسوس اللي مسكناه
تفتكر هناخد حق معاه؟
وليه منخدش حق معاه؟
أصل سفيرنا الإسرائيلي
جاي وجايب جيش محامين
غير السفير الأمريكاني
آه ده لوحده داهية تاني
طب خلاص يا عم حسين
إحنا هنحبسه هما يومين
اشمعنا يا باشا بس يومين؟
أصل الشعب الغربي ده غيرنا
عنده كرامة وعزة نفس
وأكتر من كدة أخش الحبس
واللي كمان متعرفهوش
أنا ممكن ألبس الكلبوش!!