صرخة ملهاش وطن!!

| 2011-07-05 00:00:00

بقلم: ميلاد منير
صرختي ليه
ملهاش وطن؟
دمعتي..
وصوتي شجن
قلبي اتحرق
من نارك يا وطن
عارف كده..
ولا مالكش ودن
تسمع أنيني؟!!

***
جوه فرحتي..
شايل ف إيدي كفن!!
وفي عيدي بتقل بابي
وخايف.. أصل
ساعات دمي مالوش تمن
يرخص حلمي فيك
ويندفن
وأقول معلش
بحبك بحبك يا وطن
وبحب ترابك

***
آآه يا وطن
العيب فيا.. ولا فيك؟
.. ولا الناس
ولا الزمن؟؟!!

***
ليه صوتك مكسور؟
محشور ما بين
جهل ساد.. وفساد وفتن
وعقل متوشَّح بالسواد
والدقن!!!
والعتمة مفروشة في سكتهم
وصوت عالي مين يسكتهم
لا قلب ينبض
ولا ضمير يبكتهم
كفاية بجد... ندالة..
كفاية يا وطن محن

***
يعني أرحل وأسيبك..
غرقان ف وحل؟
ولا أدور جواك
على ملامح
تاهت.. من زمن؟
ملامحي..
يا وطن نسيتها
وسبتها تندفن
ليه حضنك قاسي عليا؟
ونارك مبتحرقش غير
قلبي وتعصره
وسايب وشوش
الخراب تدمَّره

***
يا كتر الهم
يا وطن مليان
مرارة ودم
ده أنا ابنك
.. عارفني؟
ولا خلاص دمي رخيص
ومالوش تمن؟
كرَّهتني ليه فيك؟
أنا عارف إن العيب مش فيك

***
يا صوت صلاتي
إيه سكتك
ليه الفرحة
مش مطولة
بتزورنا وهي
مستعجلة
واللي مكملة
فيك وشوش الخراب
هأقول ايه
صوتي بح
من كتر الندا
أنا صح
ولا روح متمردة
ولا مجرد
حد إتجن؟!!!!