متظلموش الحكومة

| 2011-07-25 00:00:00

بقلم: ماهر دانيال
أنا مش عارف المصريين اللي عمالين يطالبو بالحرية دول، عايزين إيه أكتر من الحرية اللي انتو فيها؟

يا حبايبي في بلاد الغرب لو واحد رمى عقب سيجارة في الشارع بترحله الغرامة لحد البيت، وانت بترمي الزبالة في الشارع من البلكونة محدش بيقلك انت بتعمل إيه؟ بره لو واحد بص بس لواحدة تعمله قضية تحرش، وانت هنا بتتحرش بالبنات بجميع أنواع التحرشات محدش بيقلك انت بتعمل إيه؟ عندهم محدش يقدر يدي كلكس في الشارع إلا للضرورة القسوى، وأكتر من كده بيدفع غرامة ازعاج الغير، وانت هنا عامل فرح ابن العمدة، واول ما بتشتري توك توك بتركبله دي جي علشان تسمع وتسمع اللي حواليك، ومحدش بيقلك حاجة.

هناك مثلًا محدش يقدر يركب المترو ويشحت يتعمله قضية تسول، احنا هنا بلا فخر المترو بقى مؤسسة للمتسولين والحرامية.
في أوربا لو حصلت مشكلة كبيرة بين طرفين القانون بيتدخل ويعاقب بإيد من حديد، ويجبلك حقك، انت هنا بتكرر نفس المشكلة وبتتحل بالمجالس العرفية في كل مرة، والحكومة سايباك براحتك، وحاجات كتير من النوع ده من المشاكل متظلموش الحكومة.