طباعة الصفحةسجل يازمان
زكريا رمزى زكى |
2011-10-21 00:00:00
بقلم :زكريا رمزى
سجل يازمان
واكتب فى دفاترك بالحبر الأسود
انه فى يوم من ذات الايام
ارتوت الارض بدم الشهدا
واعتصر القلب مرارة
ومازال القبطى بيمشى على درب النار
بيجنى آلام
تانى يامصر يابلدى
دى حقيقة ولا فى الاحلام
تانى الدم يسيل على ارضك
تانى الصمت بيطبق على كل كلام
تانى أخويا يموت
وولاده يناموا الليل أحزان
وأبويا وأمى نسيوا الفرحة زمان
نسيوا حتى الدنيا تساوى كام
سجل يازمان
واوعى تنسى أى شهيد
ده شهيد وده شهيد
على ارضك نزف الدم
على ارضك مات وهو لسة وليد
نزف الدم وكان بيقول احلى كلام
كان بيقول زى حبيبه يسوع سلام
سجل يازمان
انى مصر دى بلدى
ست الاوطان
وبحب ترابها وبعشق نيلها
فى كل زمان
ودم شهيدى بيروى ويبارك ارضيها
اكتب يازمان
سجل ظلم الانسان
قبطى وبحب الناس
وبحب الله الديان
هدموا كنيستى وحرقوا تجارتى
وقتلونى
عارفين ليه
علشان وقفت بقول بتهد كنيستى ليه
عايز منى ايه
صليبى بيأذيك طب ليه
ولسة بقول يا جماعة انا انسان
ضربونى وهرسونى
وقتلونى
وجعلونى المجرم
سجل يازمان
قبطى وشايل فى ايده صليب
خارج يصرخ من ظلم وقهر شديد
طالب كلمةعدل وحق
حاسس انه فى وطنه غريب
عايش طول عمره فى محبة وخير
مات القبطى وصرخة اه بتدوى فوق الدنيا
مات القبطى وكل ما فيه بيقول ليه
مات القبطى والامر عجيب
اصرخ من أرض الموت
أصرخ لإلهك
اياك تسكت أصرخ وعلى الصوت
أطلب منه وقولوا ياربى
قصاصك .. عدلك .. مستنيه
دمى بيصرخلك بأعلى الصوت
اللى قتلنى بيجرمنى
كذب خيانة وخسة
وسقطت أخر أوراق التوت
دمى بيروى شوارع وبيوت
قلبى بيدى الحب يلاقى الموت
زى يونان صرخ لالهه زمان
من جوف الهاوية طلب
نجاه ربه من جوف الحوت
حقى عليك ياربى
مستنى تمد ايديك كمان وكمان
وتسجل يازمان
لما الهى بيدافع عنى
ضد الشيطان
بنسى الموت
المقال الموضوع يعبر فقط عن رأي صاحبه وليس بالضرورة عن رأي أو اتجاه الموقع
جميع الحقوق محفوظة للأقباط متحدون © 2004 - 2011 www.copts-united.com