"المصري المحترم".. قصيدة جديدة لـ"السقا" تدعو للوحدة الوطنية وتنظيف جراح الوطن

في إطار تفاعل الفنان بحسه المرهف مع كل ما يدور في مجتمعه من أحداث ومواقف، قام الفنان "أحمد السقا" بكتابة أغنية جديدة بعنوان "المصري المحترم"، تهدف إلى نبذ روح الفتنة الطائفية والفرقة التي باتت تهدِّد أمن وسلامة المجتمع المصري، والتأكيد على الوحدة الوطنية بين المسلمين والمسيحين، والتي تمتد جذورها إلى آلاف السنين.

 

المصري المحترم..

إن كان مقدس قبطي أو مسلم لسه راجع م الحرم..

 هو إللي يبني مش يهد.. هو اللي وقت الشدة يسد..

ما اللي فحت القناة وعلَّى السد.. وجده بنى الهرم..

ما ينفعش نقوله غير يا محترم.. عايز تبقى مصري..

علِّى سد، ومد جسر، ومد إيدك لإيد أخوك...

نبني مِيت مليون هرم..

والكلام للمقدس واللي راجع م الحرم.

للمصري المحترم.

 

يُذكر أن أن "السقا" قام بكتابة أغنية عن الوحدة الوطنية بعد أحداث كنيسة "القديسين"، تقول كلماتها: 

 شنودة أخويا قال لي يا أحمد احميني..

أنا جنبك يا أحمد صغير أوعى تئذيني..

قلت له يا شنودة يا أخويا إنت في عيني..

 بس اوعاك في يوم تصدق كلام عدويني..

دول عايزين يفرَّقونا ويخلوك تعاديني..

وإحنا هنا كلنا واحد ونيلك هو نيلي..

بعدين مفيش كبير وصغير يا خليلي..

ده أنا لو اتعريت في يوم أنت تغطيني..

وطنا واحد ونهارك نهاري وليلك ليلي.. 

أي أذى ليك يا أخويا هو كمان يأذيني..

حط إيدك في إيدي نكسر غشاوة عينك وعيني..

ونخلي شمس مصر تدفيك وتدفيني..

ونخليها تحرق عدويك وعدويني.