يا وابور الساعة اتناشر رجعنى على التحرير.. من يوم الثورة ما قامت وماحستش بتغيير

ميرفت عياد | 2011-11-19 00:00:00

تعظيم سلام لكنيسة مع جامـع .. ولكل حارة وناصية مع شارع

كتبت: ميرفت عياد

كتب شاعر العامية السكندري "أشرف الشافعي"، من عمق تجربته الشعورية وبدقه التعبير ودلالة الكلمات وكفايتها الفكرية وترابط نسيجها، قصيدة جديدة بعنوان "رجعني على التحرير"، تقول بعض أبياتها:

يا وابور الساعة اتناشر رجعني على التحرير
من يوم الثــورة ما قامت وما حستش بتغيير
وجعوا دماغنا بحاوراتهم..

خنقـــــــونا بمنــــاوراتهم

أحلامنــا غير خــــرافتهم، والفرق مابينا كبير

ياوابور الحال ف بلدنا بقى زي اللوغريتمات
ولا جيبنا حـق ولادنا ولا بــان للخير علامات
إزاي ندخـــل ف معاهدة
على إيه نستنى ونهدى
وإزاي يرتاحوا الشهدا لو ماحصلش التطهير

ياوابور الساعة اتناشر خلصنا الصبر خــــلاص
لا لمحنـــا فجــر مقرَّب ولا فيه م العتمة خلاص

قلنــــا ح نطلــــــع ونجيبه
ماهو مش ممكن حنسيبه
واللـي مــآمن بنصيبه مايخــافش من التحذير

ياوابور الســاعة اتناشر إحنا تعبنا وملينا
وكبـرنا ف عين الدنيا بس ف عينهم قلينا
سجنونا وسرقوا آمــلنا

قتلوا الأحـلام ف خيالنا
طب ح نقول إيه لعيالنا ده حسابنا حيبقى عسير
أنا ســايب أهلي ونازل علشان أحـدد لي مصير
نتقابل في التحرير!!

كما كتب قصيدة أخرى بعنوان "تعظيم سلام لمصر"، تقول بعض أبياتها:

تعظيم سلام لمصر ست الكون
أرواحنا عاشقة ترابها فين ما نكون
كامل كياننا بعشقها مسكون
وهي مهد العشق والعشاق

تعظيم سلام لكل بيت فيكي

ولكل حضن حنون مدفيكي

ياما قلت من أحاسيسي ح أنفيكي
لكني بأرجع أحنّلك وأشتاق

تعظيم سلام للجيرة والعشرة
دهب وماس برلنت مش قشرة
وشوش بريئة لا خاينة ولا كِشرة

قرب وخدلك درس ف الأخلاق

تعظيم سلام لقلوب بشر صادقة
قالوا نموت وتعيش ماهش فارقة
لكن حنحمي بكره م السرقة
ومافيش فروق لا ف دين ولا أسماء

تعظيم سلام لكنيسة مع جامـع
ولكل حارة وناصية مع شارع
هما اللي جابوا فجرك الطالــع
توأم ف لون الدم والأشلاء

تعظيم سلام يا أمي يا بهيـة
تلاتين سنة بيجربوا فيا

وأما طالبت بعيش وحرية
عايزيني أرجع عتمة الأنفاق
تعظيم سلام يا مصر
تعظيم سلام