بأمارة إيه فيه تغيير؟

| 2011-11-22 00:00:00

لما الشيطان يبقي الضمير، لما الفلول ترجع تدير، لما الفقير يفضل فقير.. بأمارة ايه فيه تغيير؟
لما الكبار ياخدوا الفلوس، لما البوليس يرجع يدوس، لما عكاشة يرجع يبوس،... بأمارة إيه فيه تغيير؟
لما المحامي يبقي ديب، لما القانون يفضل يغيب، لما الجروح ترفض تطيب،... بأمارة إيه فيه تغيير؟

لما الطريق يبقى ضباب، لما الأمل يبقى سراب، لما الحمل تكله الذئاب،... بأمارة إيه فيه تغيير؟
لما الكنايس تتحرق، لما كلامي يتخنق، لما الأماني تتسرق،... بأمارة إيه فيه تغيير؟
لما الفتن تبدأ تشيع، لما السفيه يرجع يذيع، وإحنا وراه زي القطيع؟... بأمارة إيه فيه تغيير؟
لما القانون يبقى كفيف، لما الشيطان يبقى حليف، لما جمال يبقى شريف،.. بأمارة إيه فيه تغيير؟