حالك يا مصر النهاردة... إيه؟

| 2011-11-25 00:00:00

مالك يا ابن بلدي هو أنت قالب وشك ليه؟
مش أنت يوم ما الثورة قامت قلت هيييييه؟
ورقصت في الشارع وقلت بقينا أحرار يا بيه
وأنت أصلًا محدش قال لك حرية يعني إيه
وإن الحرية مش بس حقك اللي تفضل تدور عليه وبعدين تنسى واجبك واللي عليك ما تفكرش فيه وترجع بعديها تستغرب البلد ما تغيرتش ليه؟ طب اسمح لي أقول لك يا سيدي من يوم الثورة عملت إيه؟!

عملت باسم الثورة كشك عشان تبيع سجاير
ولزقـت سـتـيـكـر الشـهـدا بـتوع 25 يناير اللي الفكيك اكتشف أنهم ماتوا في أحداث يناير وعالأرض الزراعية قلت فرصة وبنيت عماير وعملت للثورة لحاف ومش بعيد تعمل ستاير وكأن الثورة قامت لأجل الفلوس مش للضماير كأنـك لبست بنطلون ونسيت تـقـفـل الزرايـر

بعد الثورة أنت قلت كلام كتير مية مية
قلت البلد دي بلدي وهشيلها جوة عينيا
وعشانها هتغير عشان مصر البهية
لكن كانت المفاجأة أن أخلاقك هيا هيا

وكلها كام يوم ورجعت ريما لعادتها الأولانية وبقيت تشكي من البلطجة وإحنا كلنا بلطجية أصل إحنا أحسن ناس تصقف وأجدع مطبلاتية تكونش فاكر الفهلوة هتاخدك للعالمية؟ ده مفيش بلد بتتقدم وأغلب سكانها فهلوية ده أحنا عشان نتقدم عايزين عزيمة قوية واتفرج عاليابان وشوف خيبتك القوية يضربها نووي، إعصار، بركان وبرده واقفة عفية واحنا بلدنا تولع عشان عيل عاكس ولية آه لو تبدأ بنفسك بشوية احساس بالمسئولية

واللي بيقول لك الكلام ده مش واحد من الفلول صدقني أنا كنت جنبك جوا الميدان مسحول وكنت بعلو صوتي بصرخ معاك وبأقول ارحل ياللي ظلمك عدى كل العقول يمكن أكون أنا ساذج، يمكن أكون مخبول بس إن احنا نظلم نفسنا، أهو ده اللي مش مقبول هكذا وصلتني بدون اسم الشاعر