حلم وكابوس

| 2011-12-02 00:00:00

الشيخ : ايه يلا يا محمود اللي مصحيك لغايه دلؤتي ؟؟؟
محمود : مفيش يا بابا , كنت بذاكر
الشيخ : بتذاكر ؟؟؟؟ انت مش في اجازه ؟؟
محمود : انا في طب , و طب مفيهاش حاجه اسمها اجازه
الشيخ : ربنا يقويك يا ابني .... طب قولي يا ولاه , انت خدت طب نفسي ؟
محمود : اه
الشيخ : طب اصل انا بقالي كذا يوم , بحلم بكابوس و مش عارف انام منه
محمود : خير

الشيخ : بحلم , اني رايح انتخب طبعا بعد ما صليت الفجر و كله تمام بأذن الله و لكن فجاءه بيظهر شويه كفره علمانين و ليبرالين , و بيكونوا كتير , يقتحموا اللجان و ينتخبوا و النتيجه تظهر في ساعتها ان الليبرالين يكسبوا الانتخابات و يقلعوا النساء الحجاب غصب عنهم و الخمور تبقي في كل حته و كمان يكون في مظاهرات في كل الميادين بتدعو لحريه الشذوذ و بيكونوا ماسكين يفطه كبيره مكتوب عليها "الشعب يريد اسقاط البنطلون" ..
محمود : اهدا يا مولانا ,, مين قالك ان الليبرالين لما يمسكوا حيعملوا كده , او حتي اي قوه تانيه سواء اشتراكيه او قوميه او اي حاجه
الشيخ : امال انت فاكر , حيعملوا ايه ؟؟؟؟
محمود : حيتطوروا التعليم و يطهروا القضاء و حيقضوا علي البطاله وينموا الأقتصاد ويسبقوا الغرب بالعلم وبرضه حيحفظوا على دينهم
الشيخ : طب فين شرع الله
محمود : اللي هو ايه شرع الله ؟؟
الشيخ : الامر بالمعروف و النهي عن المنكر
محمود : اللي هو ايه برضه و بلاش الكلام الكبير ده

الشيخ : اللي هو منع كل ما هو حرام (خمره – زنا – سرقه – بلطجه ) و التشجيع علي (الحجاب – الصلاه – الصيام )
محمود : طب احنا مختلفناس , الكلام ده جميل , بس ديه حاجات الانسان بيعملها عشان علاقته بربنا , ايه علاقتها بالسياسه و الدوله
الشيخ : يا ابني , الدوله لازم تجبر الناس علي الحاجات ديه
محمود : و فين عقل الناس وخوفهم من ربنا اللى اقوى من الدولة والعسكر ,يعني مثلا لو انا باشرب خمره و انت جيت اجبرتيني اني مشربش خمره , فين الحسنه اللي انا عملتها ؟؟
الشيخ : مشربتش خمره .
محمود : اه انا مشربتش خمره , عشان انا خايف منك , مش من ربنا .. انت لازم تسيب الانسان يختار , عشان يكون مستحق نتيجه اختياره وجزائه من ربنا
الشيخ : انت شكلك كده يا محمود , مقتنع بفكر الناس ديه , و عاوز تغضب ربنا منك
محمود : لا معتقدش ان ربنا حيغضب مني عشان عندي فكر بيتعارض مع جهه سياسيه او تيار ديني , ربنا حيزعل مني لما اكون زي الآلة او الجماد مليش فكر او مبدأ بأبني عليه حياتي و اختياراتي

الشيخ : ايه الكلام ده ؟؟؟؟ انت في حاجه في مخك .... اوعي يلا تكون حتدي صوتك في الانتخابات للكفره و الملحدين بتوع الدوله المدنيه و تسيب اللي عاوزين الدوله الاسلاميه , تبقي بتخون دينك و إسلامك
محمود : لا يا بابا , انا لو اخترت واحد بيستخدم الدين ليصل لهدف ارضي سواء سلطه او فلوس او اي مصلحه ابقي بخون عقلي و فكري و ضميري ,,,, الناس اللي عاوزه دوله دينيه مفهاش حرام زي ما هما بيقولوا , يشتغلوا في الجوامع و الكنايس او اي مكان يوصلوا منه لقلوب الناس من خلال كلامهم و مطنقهم , يعني انا لو شيخ جيه و كلمني حد عن الجنه و الحرام و الحلال مش حسمع له ؟؟ لا طبعا حسمعله , عشان شيخ ,, بس يا فرحتي يجي وزير او رئيس يكلمني عن الجنه و الحلال ,,,, يروح يتنيل يتكلم في الاقتصاد و البطاله و التعليم

الشيخ : محمود ... انت لو انتخبت ليبرالي او اشتراكي او اي حد من الناس اللي عاوزه دوله مدنيه , تبقي لا أبني و لا اعرفك
محمود : ليه يا بابا , بتربط حبك لي , باختياري ..... بابا انت لازم تثق انك ربيت ابنك تربيه صح و عمره , ما حيختار غلط . اهم حاجه روح كمل نومك و فكر بمنطقيه , و برحتك لو انت شايف ان الرجل بتاع التيار الديني كويس روح انتخبه , بس روح انتخبه عشان كويس مش عشان حينصر دينه لان الدين الصحيح بيكون فيه الانسان قدوة لغيره ويكون مرآيه لدينه . و انا حاروح انتخب اللي شايفه يقدر يفيد البلد ديه بطريقه علميه منطقيه ,, هي ديه يا بابا اللي اسمها الديمقراطيه و حريه التعبير عن الرأي اللي بتدعو ليها اي عقيده دينيه او فكريه
- و ينتهي الحوار بين الاب و الابن , و ينتهي الصراع الفكري بين القديم و الجديد بين التقليدي و العصري الي النقطه التي نريدها جميعا و هي الاحترام المتبادل بالرغم من الاختلاف , فيذكرني ذلك بمقوله العظيم فولتير :
مهما اختلفت معك سأدافع عنك إلى آخر رمق في حياتي حتى تعبر عن رأيك بكل حرية