يا تسترجلوا يا تتحجبوا

| 2011-12-03 00:00:00

سمحوا لي اكتب المقاله ديه بالعاميه عشان اعرف اعبر عن كل اللي في نفسي , اولا ايه حاله الهياج و الهبل اللي عند بعض الناس من فوز التيارات الاسلاميه , و كأنهم عرفوا ان التيارات الاسلاميه حتنزل بعد الفوز تقيم الحد علي كل اللي منتخبهاش ,,, في ايه يا جدعان متسترجلوا شويه و تعرفوا ان مادام هما قدروا يستقطبوا الناس ليهم خلاص الناس اللي انتخبتهم تشرب بقي من اللي حيحصل أصل للأسف احنا مش بنتعلم ببلاش ,و معلش هي كام سنه و المجلس حيتحل و ينتخب من اول و جديد , غير ان ديه مرحله اولي و لسه في اعاده يعني الموضوع مش ضلمه قوي ,,, غير مع احترامي الشديد ,,, يلعن ابو المجلس علي اي حد يحاول يمشي رأيه علينا بالعافيه , ياما كنا رجاله و وقفنا قدام مدرعات و دبابات ,,,, في أيه ؟؟؟ احنا لازم نتعلم من اللي حصل و ندرك اننا غلطنا في كذا نقطه و انشألله الغلط ده مش حيتكرر , ديه مجرد تنبيه عشان نشد حلنا و نكثف نشاطاتنا و نوعي الناس اكتر, و كمان عشان نتوحد و مينفعش الهبل اللي القوي المدنيه بتعملوا ده , لازم ندرك ان المصالح الشخصيه مش وقتها دلؤتي , و ان هدفنا واحد و هو دوله مدنيه محترمه بتحترم حق المواطنه و الانسانيه ....

و طبعا احب أهني اخواتنا من التيارات الدينيه و اقولوهم احنا مش في حرب , و مبروك عليكوا المجلس بس ياريت تعرفوا حاجه واحد مجلس شعب يعني مسؤليه , يعني سن قوانين و مراقبه الحكومه , مش مراقبه الفنانه الفلانيه و لا الاعلان الفلاني , في حاجات كتيره قوي لازم نعملها عشان البلاد تقوم و تقف علي رجلها , و مع احترامي الشديد لمؤيدين التيار الديني و في ناس اعرفهم شخصيا عندهم رؤيه و فكر و لكن في ناس تانيه بجد بحس انها تافه اوي , و نفسي اسألهم ناوين تنضجوا امتي ؟؟؟ بجد لما الاقي شخصيه كاتبه "لقد انتصر الاسلام يا كفره " و لا واحد تاني "مع السلامه يا نصاري" بجد بحس اني بتعامل مع عقول لسه مدخلتش مدارس ,,,, يا ريت مثقفين التيار الاسلامي يبدأوا ينضفوا عقول البشر ديه عشان للأسف الاشكال ديه مديه للناس صوره سيئه للتيار الاسلامي , اللي بالرغم من اختلافنا معاه الا اننا بنحترمه ..... و اخيرا نفسي اوجه رساله للشعب المصري كله , مع اني مش عارف ازاي بس نفسي أوصل لكل مصري و اقوله , الف مبروك علينا الانتخابات و بالرغم ان كان في الكثير من الاخفقات و التلاعب في النتايج اللي له تأثير واضح حتي لو كان التلاعب ده بطريقه مباشره او غير مباشره , بس برضه مبروك علينا التجربه و المفروض دلؤتي ندرك اننا في مركب واحد يا نوصل كلنا لبر الامان يا نغرق كلنا , فيا اسلامين اعلموا اننا لن نتنازل عن افكارنا مهما كان التمن و يا ليبرالين اللي يحب مصر عمره ما يسيب مصر و دلؤتي فرصتكوا عشان تثبتوا نفسكوا فيا أما تسترجلوا و تكملوا اللي ابتدتوه أو تتحجبوا و تقعدوا في البيت و تسيبوا ناس تانيه تتحكم في مصيركم , مفيش حاجه اسمها أغلابيه تتحكم في اقليه , الكلام ده هناك في دول العبوديه و الشعوب الجاهله , مينفعش الكلام ده مع الاحرار , الحر يموت بكرامه و لا يعيش بذل و هوان , فهناك مثل ياباني يقول :
يموت الجبان مِرَاراً قبل موته

و احنا عمرنا ما كنا جبناء و الدليل الدم اللي سال مننا عشان مبادئنا و عشان كرامتنا , فالنهايه لسه مكتبتش عشان الاحرار لسه مخلصوش كتابه .............. ثوره الحريه مستمره ...............