حداد!!

| 2012-02-03 00:00:00

يا لابسة السواد عبايات
وشاربة من الجهل
حكايات
وعزوة الأهل
وحق اللي مات
نفسي أقول فيكي
حاجات
بس اتعلقت
بصوت السكات
علشان مهما صرخت
بحس إن الوقت فات
مع إني بصبَّر نفسي
عليكي
وأبص تملي في عنيكي
الغرقانة بلؤم البنات
أقول هاتُفرج
وهاترضى في يوم
وتضحكي زي نجم السموات
بس أتاريك بتضحكي عليا
بتصبريني على سوادك
وتشوقيني لبعادك
وتخليني أكتبلك أغنيات
نفسي تسمعيني ف مرة
ونفسي لما تقتلني
تقولي أنا اللي قتلتك
مش تعملي حداد
وتمشي ورايا ف جنازات
وكأن روحي طلعت بإيد
حد غيرك كتر ألف خيرك
ياللي ضميرك مات!!