عزومة مراكبية!!!

جرجس ثروت | 2012-02-14 00:00:00

بقلم: جرجس ثروت
عم "خليل" المراكبي الأسمر الجميل في وشه خريطة للنيل.. وسماره من لونه وشغلته مفرحاه، عشان طول النهار على صفحة النيل، وعملت منه للعشاق ربان ودليل.. يركب معاه فرسان العشق وقت الغروب عشان يقولوا في الحب كلام يسر القلوب.. وكلنا نحبك يا نيل ويا خليل ونعشق مراكبك لو بشراع أو حتى موتور أو لو بمجداف وأنت بتجدف بالدراع.. لكن خفة دمك عملت منك بطل على كل لسان يا خليل، لما يقولك يا عم دي عزومة مراكبية؟؟؟ إلا هو صحيح أنت بتعزم بقلب جامد على الفطور أو الشاي عشان عارف إن اللي على البر بعيد ومش جاي.. حتى برضو لو كان كدا، مع إني عارف أصلك الكريم، لكن عزومة المراكبية عايشها أنا.. وبرغم خفة دمها بقت ثقيلة عليا، وبعيد عن طيبتك وطهارة جبينك يا أسمر يا ابن النيل يا خليل بقى في أنجاس كتير.. كرَّهونا في الكلمة وصارت مشينة لكل زين.. حتى لما جيت أنا في الدنيا كانت حياتي أقولك إيه عزومة مراكبية.. عايش ومش عايش.. مواطن ومش، وطافح الكوتة وباكل الدود في المش.

يعني إيه أكون مواطن وأصل البلد ولا يكون فيه دم ولا حمرة خجل في الوش؟.. لما يطلع نطع ويقول كلهم تلاتة أربعة مليون ودول أقلية.. وسكتنا كتير على ابن الولية وقالوا بلاش طلبات فئوية عشان دي مرحلة دقيقة وانتقالية.. لكن طلعت فترة مننا انتقامية.. وجات على رؤوس أهل سلام ولا في حياتهم غير حب بلادهم والصلاة ليها بسلام، لكن أقول ومن غير كتر كلام، ولا ينفع الخير مع الردي وابن اللئام.. لما أتقدّم لوظيفة وأنا صاحب حق وإيدي نظيفة ويجيبوا رمة وغير كفء ولو اتكلمت يقولك تاخد بالكف.. وتبقى وظيفتك اللي اتقدّمت ليها بطلب عزومة مراكبية.. وتعبنا كلام وشكوى في الحكاية دية، نقولهم مطلوب لينا كوتة ويطلع من عندنا اللي يعمل زعيم أونطة ويرفضها، وعاوز له ستين موتة عشان قتل الأقباط، وحرم من التنوع البلاد ووقعها فريسة للي يقولك أغلبية وموافقة وبقت هيصة.. طيب يا شملول نزل الأقباط الانتخابات ونزلنا بالملايين مش بالآلفات وأصواتنا اتبخرت واختفت زي ما في "ماسبيرو" جثثنا في النيل وجنب مركب خليل اتحدفت!.

يقولك أنت تنزل الانتخابات أنت مواطن وتنتخب، وأتاريه كان مقلب وكانت عزومة مراكبية.. عشان فيه اللي طلع لـ"مصطفى النجار" و"الشوبكي" كمان وقالك بس دول مرشحين الكنيسة، وبجلالة قدرهم طلعوهم أقباط وأقلية.. ما بلك لما القبطي يترشَّح قال إيه والمطلوب ينجح هه!!! ولما يعينوه وفي لجنة يحطوه يقف في المجلس عشان يقول رأي يطلع الكل يعترض ويبقى بلاش منه الكلام والرأي، ويبقى برضو كلامه عزومة مراكبية.. بقت محسومة القضية، والخطر مش بس في استضعاف الأقلية، لأ.. الخطر في فكرة تهميش وتطنيش القضية، وفيها البلد على صفيح ساخن.. وهتطلع نيران من المداخن ويمكن تاكل الأخضر مع اليابس، ومش كدة وبس.. لما يزيد الإحساس بإني ولا حاجة وكل ظروفي ومستحقاتي بقت عزومة مراكبية.. وهنا تبقى الخيبة القوية، والمثل اللي كان يضحك بقى يجيب الغم والضغط من الصورة المخزية في القيادات العليا في المناصب الرفيعة.. في كل حتة وطريق وسكة النسبة مخزية، ويقولك اتقدّم وبرضو هتترفض.. عزومة مراكبية.

واتعودنا على الحقارة دية، لكن فيه مشكلة حقيقية، لما تاخد ابن شلبية وابن سنية وتحطهم في أماكن بكوسة ولا معرفة قوية، وخبراتهم زيرو في المواقع دية.. وتتكشف الخيبة القوية فساد بالوبية وجرسة مش مدارية.. دا المثل قال إدي العيش لخبازه، لكن دي خطة وممنهجة، واتحطت عشان تهجر وتعزل فئة من أهم وأطهر شخصيات وقادة، وليهم في كل العالم بصمات.. وقالك مش عاجبهم يمشوا، وقالوها ولا اختشوا!!! لكن برضو يقعدوا يقولوا "ليهم مالنا وعليهم ما علينا"، وفي قعدة مهينة تتطرد وتتهجر من الأسر القبطية تمانية.. وهو بيمشوهم قالوا والله ما كان جائز لكن عشان حياتكم اللي في خطر والفتن كل شئ جائز.. هه!!! فعلاً يا رجل، شريف أنت أنقذتهم بعد ما هتتملكوا أرضهم وتحتلوا متاجرهم، ولسه فاكر إنهم أحياء، أنت درست الفلسفة دي فين؟؟؟ ولا مهندس وبتاع أحياء؟؟؟ بتقتلوا بلد وجرايم حرب ولا بتسقط بالتقادم، أنتم بتطردوا أصحاب وطن أصليين مش كلاب ضالين.. ولو فاكرين إنكم لوحدكم عايشين وهتفلتوا بجرايمكم يبقى مخدوعين.

وجات أحداث يناير اللي فات، واللي جه بنفس الوش الشوم وفساد.. واتمرمرت حياة العباد، وتأخرت البلاد، وراح الاقتصاد، وبدل ما ننتظر خير أخدت الباقي منه وراحت.. ومطرح البرامج اللي تنمي جات تصريحات تقرف وتعمي وطيَّرت عقود سياحة بالمليارات، وما حدش عارف ليه يسيبوهم؟؟؟ يمكن عشان الجوع أكتر يعم ويقتل الواحد صاحبه وابن العم!.. وبدل ما نشوف في المجلس شباب الثورة بيجلس وبيحكم، جات ناس من كل حتة مش منهم.. وبقت فوضى، وكله عاوز يبقى ريسها ويحكم ويتحكم.. وكانت لينا رومانيا سابق على الدرب، ومشينا وراها وهتفنا من كل القلب، عاش اللي يركبنا ويفضل الذل والفقر والفساد ووجع القلب.. وبعد وصف اللوتس وكلام يشرح القلب، طلعت لنا أشباح، وهنبقى مهزلة في الفشل وغير الإصلاح.. أتاري حتى الحلم والأمل في بكرة بعد كل فواتير الدم الغالية وبعدما بقى في كل شارع حزن وهم ولا بيتلم.. وباين عليك شعب لعنة الفراعنة حلت عليك، وطول عمرك في الخير والتقدَّم معزوم عزومة مراكبية.

المقال الموضوع يعبر فقط عن رأي صاحبه وليس بالضرورة عن رأي أو اتجاه الموقع