أنا من تراب

| 2012-04-03 00:00:00

أنا من تراب
مكتوب عليّ العذاب
شوية تتفتح السكة
بعديها تتقفل الأبواب
وعلى ده الحال
دوام السعادة من المحال
والدنيا بتجري
وكل شوية بحال
لو يوم مدت إيديها
تزئك بكرة برجليها
ما هي غدّارة
وما فيش عزيز عليها
بس السعادة لازم تتعاش
استغل الضحكة اللي ببلاش
يمكن تفوت اللحظة
وما ترجعلهاش
وخبي الدمعة اللي في عنيك
وما تضحكش الناس عليك
ولو نزلت جامدة قوي
بسرعة امسحها بإيديك
عيش راجل واقف صلب
ما بينحنيش في وقت الضرب
يفضل يضحك على بلاويه
ويقول نكت في حالة الحرب

المقال الموضوع يعبر فقط عن رأي صاحبه وليس بالضرورة عن رأي أو اتجاه الموقع