وإحنا ذنبنا إيه؟!

د. مينا ملاك عازر | 2012-04-15 00:00:00

بقلم: مينا ملاك عازر

عزيزي القارئ، يوم أن ترشح المهندس الشاطر خيرت الشاطر بعد أن استقال من منصبه كنائب ثاني لمرشد الإخوان، قال أحد القيادات إننا رشحنا الشاطر لإن العسكري مش عايز يسحب الثقة من الحكومة بتاعة الجنزوري إللي هما أصلاً مباركين وجودها. يا جماعة الإخوان ويا جماعة القراء، عشان بس ما يبقاش فيه لبث وبصراحة، أنا لما سمعت التصريح ده شعرت أنه يريد أن يقول أن ترشيح المهندس خيرت عبارة عن عقوبة أو قرصة ودن لصحابهم العسكر على أنهم ما سمعوش كلامهم ومشوا الجنزوري، فسألت نفسي سؤال بريء أتلوه على حضرتك الآن في بساطة وود وتواضع منك، تجاوبني الله يكرمك، طب هما بيلعبوا مع بعض، شيل ده يشيل ده، حط ده يحط ده، وفجأة ألبوا على بعض بجد أو بتهريج أو تمثيل المهم واحد منهم حب يعاقب التاني أو يضايقه أو يحرق دمه أو يكيده أو يغيظه أياً كان ما كان يريد أن يفعله به، المهم إحنا بقى ذنبنا إيه إنكم ترشحوا لنا الشاطر ليكن رئيساً لنا؟ هو إحنا إللي كنا جبنا الجنزوري ولا إحنا إللي قلنا لا ما يمشييش، ولا إحنا إللي زعلناكم يعني، هو الشاطر ده حايبقى رئيس للعسكر، وللمدنين حايبقى مواطن عادي؟ ما هو علينا وعليهم، ولو قصدكم ترشحوه لكي تعكننوا علي العسكر في مرشحهم إللي هما عايزينه، طب وإحنا مالنا مشاكل الصغيرين دي توقعوا فيها الكبار–الشعب- ليه؟ خلافات الأحباء والمتزوجين ما يدخلهاش حد هي انتخابات الرئاسة دي مثلاً أودة نوم اختلفتم مين يجيبها، ولا يعني حكومة الجنزوري دي إللي مضايقاكم أوي دي مثلاً كانت ضرتكم فبتكيدوها، ولا كان الجنزوري ناوي يترشح فإنتم حبستم دمه، وحتى لو كان كل ما سبق صحيح بأسألكم تاني إحنا بقى ذنبنا إيه؟

إحنا مالنا ومال مشاكلكم؟ هي رئاسة مصر بقت بالتفاهة بما كان ليكن الترشح لها من أحد ما عقوبة لطرف آخر؟ يا دي الوكسة إللي بقيتي فيها يا مصر، بقت رئاستك عقوبة زي بالظبط إللي عايز يضرب العيل بتاعه أأأ على أيده عشان ما يعملشي كده تاني أو يحط في لسانه شطة عشان ما يقولشي كده تاني أو يحبسه في أودة الفئران. عامةً كويس إنكم عارفين إن ترشيح الشاطر كارثة وعقوبة يستحقها العسكري، ولكن هي عقوبة لا تستحقها مصر ولا يستحقها المصريين.

أما بالنسبة لما قاله المرشد فعلاً، بأنه دعوة الشاطر مستجابة وما تيجوش ناحيته، ده بقى نعتبره برنامجه للرئاسة، ونسمي برنامج المهندس "دعوة ولية ساعة مغربية أوفجرية"؟! ويبقى مصر ما حَدِّش يقدر يجي يمتها، إللي حايضايقها الرئيس بتاعها حايكشف راسه ويدعي عليه ويجيبه أرضاً، وإللي حايبسطنا ويدينا منح ومعونات ندعي له ربنا يرزقه برزق عياله، ويستره دنيا وآخرة، وينورها له ويشفيه من كل مرض، ويبعد عنه ولاد الحرام، ولا نعتبر برنامج الرئيس الشاطر إيه بس قولوا لنا؟ لو الشعب اختلف معاه في مرة ولا وقفنا في ميدان التحرير بنقول له ارحل يعني امشي مثلاً، يدعي علينا يقوم ميدان التحرير وإللي فيه يتخفس بيهم الأرض، دي نيلة إيه اللي إحنا فيها دي؟ يا رب ارحمنا، طب بالعند فيكم أنا إللي حادعي عليكم وأقول يا رب إللي يجي على مصر والمصريين والثوار وإللي يضحك على الشعب الغلبان ويستغلوه، إياك يا رب ينشكوا في لسانهم وتتشل إيده، وجاته ضربة في معاميعه، وما تسألنيش عن معاميعه دي اسألهم هما أدرى.

المختصر المفيد يا أمة ضحكت من جهلها الأمم.