فين مصر؟!!

| 2012-05-12 00:00:00

بقلم: أكرم شحات
صحيت من الثوره .بفرك عييا .ببص حواليا .
لقيت بلدنا مش اللي هيا !!
فين البلد .امل الولد

فين القبط والمسلمين
فين الايدين متشبكين
ووعدنا مع بعضنا ومكملين

مع ان مفيش جلادين
والسجانين بقوا مسجونين
لكننا متلخبطين
زي طير ربطوه سنين
واتفك مره .معرفش يومها يروح لفين
وانا شفت اعمالنا سوا جوا التاريخ متسطرين
مع سعد باشا.كنا ببعضنا محروسين
والانجليز انطردوا يوم ما كنا واحد مش اتنين

دلوقتي فين !!!؟
اللي زمان كان اسمهم مصريين !
بقوا اقباط..ومسلمين
والاخوات متخونين
وكفار ...ومؤمنين
ولبعضنا متربصين

كان نفسي اشوف مصر الامل
مصر الحضاره والعمل
مصر الهرم واللي اتعمل
واللي ضحي يوم بدمه
.عشان نجاحنا يكتمل
وامال كنا ويا بعض
المستحيل كان يتعمل
دلوقت فين مصر يا ناس؟؟؟
يمكن في نومي وطني اتبدل !!!

وفضلت ادور في الشوارع والحارات
علي صوت لوحده كان زمان دلوقت مات
ان بلدنا ده بيت كبير فيه اخوات
لكن مع صراخ الشتايم اصبح .سكاات
والوطن بيعيش اهات .......

قولت انام .يوم..يومين ...او حتي عصر
بس نفسي .لما اصحي .الاقي مصر

المقال الموضوع يعبر فقط عن رأي صاحبه وليس بالضرورة عن رأي أو اتجاه الموقع