الرجل الحقيقي

إيهاب اسبري | 2012-07-10 00:00:00

بقلم- إيهاب اسبراي
الرجل الحقيقى بالنسبة للمرآة مش هو الرجل اللى بيمارس ذكوريته أو رجولته على المرأة لكن اللى بيحتويها بقلبه يحتويها بحبه يحتويها بعطائه عشانها و إنه يعمل اى حاجة عشان يسعدها و يبقى يوم سعده وفرحه لما يلاقى الضحكة منورة وشها والفرحة مالية قلبها ومايستحملش عليها الهوا الطاير زى مابيقولوا وتبقى مبسوطة وسعيدة كدة وبيبان علطول لما المرآة بتحب رجل وبتبقى سعيدة معاه علطول تلاقيها بقى بتهتم بلبسها ومكياجها علشانه تحط البرفان اللى هو بيحبه وهى معاه ماتستحملش حد يضايقه أو يزعلّه وبتبقى ملهوفة عليه و ( بيبان اوى دة على فكرة حكاية إنها بتبقى ملهوفة عليه ).

و لما بيكونوا مخطوبين بتبقى مستنية من آخر لقاء له معاها هيكون إمتى اللقاء القادم وبعدين تلاقيها روّحت البيت تكلمه فى التليفون تكمّل الكلام اللى هو اصلا كان بقالهم 3 ساعات بيتكلموا دون إنقطاع كل دة بيفتكر الرجل وقتها إن دة حق له و إنها هى بقت خلاص رهن إشارته وبقت بتاعته يعنى ملكه الخاص زى عربيته وشقته كدة يعنى لو كان عنده شقة اصلا مش واخدها إيجار جديد او هى كانت اوضة البواب و طمع فيها يعنى للأسف مابيقدّرش حبها ولاّ إهتمامها بيه ولا قلبها الغالى اللى احتواه وحطه جوه عينيه ماهى القلوب ليها عينيين برضه بتشوف بيها بس دة موضوع تانى ممكن نتكلم فيه بعدين ..

المهم بقى لو حصل اللى حصل بقى يندم بقى أخينا دة بعد كدة طيب ياعم ما كان من الأول إنت مش مدرك النعمة اللى بتبقى فيها إن فيه بنت بتحبك هو حد لاقى هو حد طايل اصلا انا نفسى مش طايل ولا لاقى ههههههههه دى لوحدها عطية من ربنا خصوصا يعنى لو كانت بتحبك حب حقيقى و أثبتت لك دة بطرق كتير وإنت مش عاوز تاخد بالك و بتحاول تفهّمك وإنت ولا على بالك يا بتعمل عبيط يا بتعمل مش واخد بالك يا إما إنت بتكون مش فاهم فعلا الإشارات والعلامات اللى تخلى اى واحد قلبه منور بيفهم و يعرف يشوف صح اما بقى لو قلبه مضلم أو بعيد عن السامعين والموجودين أعمى القلب يبقى دة مالوش حل بقى بس خللى بالك من نقطة مهمة جدا المرآة المحبة لو قلبت بتبقى كائن آخر تماما وممكن تنقلب ضدك اكتر ما كانت بتحبك لو غدرت بيها او سفهت منها أو خنتها مثلا إياك ثم إياك ثم إياك تجرح بنت كانت بتحبك تجرحها فى كبريائها فى كرامتها فى مكانتها اللى المفروض تكون اعلى مكانة عندك تجرحها فى مشاعرها تجرحها فى نفسها !!! يبقى إنت بقى ياشاطر اللى جنيت على نفسك و فيه مثل شعبى مشهور بيقول كيد النسا غلب كيد الرجال نصيحة شخصية اخوية إياك تجرح مشاعر اى كائن لطيف وجميل ورقيق اللى هو بنسمّيه المرآة.

المقال الموضوع يعبر فقط عن رأي صاحبه وليس بالضرورة عن رأي أو اتجاه الموقع