طباعة الصفحةكان نفسي أكون مخطوف
إيهاب شاكر |
2013-05-22 23:08:04
بقلم: إيهاب شاكر
مش بطولة ولا جدعنة
ولا على الشهرة ملهوف
ده العمر مش بعزقة
ومحدش يرمي نفسه في التهلكة
ويقول انقذوني اعملوا معروف
لكن منظر المخطوفين وهم راجعين غاظني
غاظوني لما إدوا التحية للمدعو رئيس
ومش عارفين إنه هو الخاطف
هو المسئول، هو اللي يتحاسب
هو اللي رمانا في تلك الظروف
الجيش المصري اللي الكل يعملوا ألف حساب
بقت عساكره زي الحمام من شوية ذئاب
بقى معقول في مملكة الحيوان يحكم الخروف
بقى معقول نتفاوض مع الإرهاب
ولا دول الأهل والعشيرة والأحباب
واللي ساعدوا في الهرب في اليوم الهباب
وخلوا مصر عار واللي ما يشتري
يتفرج ويشوف
آه يا بلدي
كان نفسي وأنا راجع مقهور مكسور
بدل التحية أقول ح..ف
حس بمصر شوية
حولتها لتكية
وبقت عار على الشعوب
مصر مش شوية
دي بالملايين مش ألوف
ولحد دلوقتي مجالهاش رئيس
أصل احنا في عصر التهييس
عصر اللمون
عصر الضيوف
الضيوف اللي اتملكوا
بالتزييف والتهديد بالسيوف
لو كنت ضمن المخطوفين
وأنا راجع وبيستقبلني
هأقوله انت بتستهبلني
انت فاكرني خروف
سمع وطاعة ونطاعة
من دي الساعة مالكش عليّ تحية
من دي الساعة انت الخاطف وانا المخطوف
كان نفسي بجد أكون مخطوف
المقال الموضوع يعبر فقط عن رأي صاحبه وليس بالضرورة عن رأي أو اتجاه الموقع
جميع الحقوق محفوظة للأقباط متحدون © 2004 - 2011 www.copts-united.com