انجاز واللمبة الجاز وأنبوبة البوتاجاز

انا مش عارف ازاي الحكومة او الرئاسة او الاخوان بتتكلم عن انجازات الرئيس مرسي ليه هو الناس دي مش عايشة معانا في البلد ومش شايفيين اللي بيحصل فيها.

اه والله ممكن يكونوا مش شايفيين اللي بيحصل اصل النور قاطع علي طووووول ,لا بس استحالة يكون النور بيقطع عندهم زي ماهوا بيقطع عندنا دا دول هما شعب مرسي المختار وعلي حد تعبير مرسي اهله وعشيرته ازاي بس يتساوا مع باقي الشعب الغلبان المغلوب علي امره الشعب اللي مشافش يوم حلو من ساعت مخربها (قصدي مسكها) الاخوان. 

 

لا ولسة الصيف وحره داخل علينا والنور قاطع يعني ملهاش حل غير ان كل مواطن حران ينزل يجيب مولد كهربائي ب اربع خمس تلاف جنية ودا عادي جدا اصل المصريين دخل الواحد فيهم بيعدي ال عشرين الف جنية في الشهر حسب اعتقاد الحكومة ,ودا اكيد اللي الحكومة عاملة حسابها عليه والا تبقي حكومة فاشلة عندها نقص جامد (قصدي طبعا نقص في الطاقة ومش النقص اللي في دماغكوا).
 

انجازات ايه دي اللي بيتكملوا عليها والنور والكهربا والطاقة بقي من الكماليات

وبقينا نشوف البائعين بتوع المترو بطلوا يبيعوا السبح والكتب الدينية وبقوا يبيعوا بدلها الكشافات الصيني ابو 2.5 جنية او الولاعة ام لمبة ام 2 جنية .

لا وكمان مكنتش مصدق عيني لما كنت بتمشي في وسط البلد العادي انك تلاقي فرش ع الرصيف يباع عليه ملابس والفرش اللي جنبه بيباع عليها جزم وكوتشهات انما المفاجأة كانت في الفرش اللي بعده الفرش معروض عليه العشرات من اللمض الجاز(اللمبة الجاز) اه والله اللمبة الجاز اللي كنا بنشوفها في الافلام القديمة بتاعت امينة رزق ويوسف وهبي ايام الفن الجميل والزمن الاجمل اللي عمرنا مشوفناه بس اللي شكلنا هنشوفه تاني علي يد الاخوان وياريت نشوف حاجة حلوة من بتاعت زمان ذي الاخلاق العالية او الاحترام او حتي النظافة لا دا احنا كل اللي هنشوفه من ايام زمان هي الضلمة و اللمبة الجاز ودا ان لقينا الجاز اصلا .

ودا يدخلنا علي مشكلة انبوبة البوتاجاز اللي الواحد مش لاقيها خالص من ساعة الثورة وان لاقيناها بندفع فيها ارقام فلكية بالنسبة لسعرها الاصلي اللي كان 2.5 جنية وبعد مشروع النهضة بقت ب 8 جنية والاسعار السابقة دى اسعار الانبوبة بسعر الحكومة من المخزن اللي عشان تقدر تشتري منه لازم تقف في طابور طوييييل وممكن لما ييجي دورك يقولولك تعالا بكرة احنا خلصنا النهاردة فلن يكون امامك سوي انك تولع في نفسك وفي المخزن وفي الانابيب كلها او اما انك تشتري الانبوبة من تحت البيت بسعر السوق السودا اللي بتوصل بيه الانبوبة للمستهلك اللي اصبح سعرها يتجاوز ال 50 جنية في اوقات ازمة الانابيب !!! 

يعنى معندكش بديل عن بابور الجاز (وابور الجاز) عشان تخلي ام العيال تطبخ عليه فرخة من بتوع التموين بس برضو وابور الجاز دا اكيد محتاج جاز يا حلوين بس هتجيب الجاز منين يا مسكين والبنزينة الطابور بتاعها من شبرا للمهندسين وهتلاقي فين جاز او بنزين وسواقين المكروباصات مش لاقين وايديهم علي خدودهم حاطين يا مواطن غلبان ومسكين مش لاقي ولا جاز ولا بنزين .

يعني ببساطة كدة المواطن المصري دلوقتي محروم من النور والكهربا والجاز والبنزين وانبوية البوتاجاز والمسؤلين بيتكلموا علي الانجاز بجد انتوا شوية معرضين !!!!!!!!

في النهاية احب اقول لواحد في بالي عبارة واحدة بس وهي "لمبة جاز يا ابو انجاز"

وفي نهاية النهاية احب اعرفكم ان المقال كتب بأكمله أثناء انقطاع التيار الكهربائي والله العظيم !!!!!