اكتب مقال

بقلم: مينا ملاك
تعرف تكتب مقالة عن أي موضوع؟ الموضوع مش صعب حدد الموضوع وافتح صفحة "وورد" واكتب رأيك في الموضوع على شرط أن تكون مُلِم بكل ملابساته وياريت تكون المقالة هادفة. ياللا بدأنا الامتحان، أمامك وقت محدد جدًا تختار الموضوع وتجمع المعلومات وتكتب المقالة.

تحب أساعدك؟ عندك مثلاً ممكن تكتب عن أنفلونزا الخنازير وتشير إلى عدد الوفيات الذي يتزايد بسرعة ملحوظة كل يوم بالأربعة والخمسة والفارق عمال يزيد، في حين أن الأهلي الفارق بينه وبين أقرب منافسيه ثابت! وبالمناسبة سمعت إن العالم الآن صار مهددًا بأنفلونزا المعيز "ماء ماء ماء".

وعندك كمان موضوع عن ترشيح البرادعي وهجوم الصحف القومية عليه بالمناسبة البرادعي مصري ورغم كده ليس من حقه الترشيح إلا من خلال عباءة حزب من الأحزاب الكرتونية الخاضعة الخانعة منذ ردح من الزمان! وده بحكم الدستور!

وعندك موضوع كمان عن شراء مصر للكهرباء! أيوه للكهرباء مالك ما تستغربش عشان ما تضيعشي وقتك الوقت بيجري والامتحان هايخلص، ما تسألشي عن السد العالي بيقولوا مش مكفينا، وكمان الحكومة خايفة من إيقاف الحضري لأنها بتقول إن هو دة السد العالي فلازم تلحق تتفق مع حد يبيع لنا كهرباء في الوقت الموقوف فيه الحضري.

ممكن كمان تكتب عن ماتش الأهلي والإسماعيلي الذي تقول الصحف إنه خرج وديًا والفريقين والجماهير حبايب تحت علم مصر، والعلم فوق رأسنا مع أنني قرأت خبر أن جماهير الأهلي "فوق الجميع"، أهانت زوجة الحضري والحارس نفسه نجى بفضل الأمن من جماهير الأهلي، نادي القيم والمبادئ ولا تعارض بين المبادئ والقيم من ناحية والاعتداءات على من يخونوا الأهلي من ناحية أخرى، حلال على الأهلي يشتري اللاعبين ويركنهم وحرام على اللاعبين تمشي وتسيبه!

سيبك من الأهلي اكتب عن العميد اللي خلى الزمالك عنيد ويغلب المصري بالتلاتة ويتعادل مع الأهلي ويهدد اتحاد كرة القدم بأن يلجأ للفيفا لو لم يحل أزمة أحمد عيد عبد الملك الذي يرى الزمالك اشتراكه في مباراته مع الحرس ضمن صفوف الأخير غير قانوني في حين يقول الحرس أنه لم يكن يعلم إلا بإيقافه مباراة واحدة واتحاد الكرة لم يعلمهم بعقوبة أكثر من ذلك، في حين أن هناك من يقول أنه ليس للزمالك حق في طلبه بإعادة المباراة على أساس أنها أقيمت أول أيام عيد الأضحى المبارك أعاده الله علينا وعليكم بالخير واليمن والبركات.
فكان لازم يشترك أحمد عيد. خلي بالك الوقت بيجري ومهما جريت وراه ممكن ما تلحقهوش وبالتالي هاسحب الورقة أو جهاز الكمبيوتر من غير ما تكون كتبت في أي موضوع، أقول لك أكتب عن نص المجتمع "المرأة" التي صرح عنها مجلس الوزراء بأنها صارت تشغل في مصر أربعين بالمائة من الوظائف العليا، ومع ذلك بيفكروا يوافقوا على مشروع تاكسي خاص للسيدات فقط، طبعاً أنا ما أعرفشي الوظائف العليا دي تبقى إيه يعني من مدير عام وأنت طالع ولا من محافظ وأنت نازل المهم إنها عليا مش سفلى.
بيني وبينك المرأة واخدة حقها في البلد دي بتمشي في الشارع ما حدِّش بيجي ناحيتها ولا تلاقي واحد ماشي بيتفحصها بعينيه ناقص يأكلها ولا حاجة أبدًا –صحيح هي البنات أحلوِّت كده ليه-!
الوقت كده خلص مش هاقدر أعمل لك حاجة هات أدوات الكتابة أديتك فرصة وإنتَ اللي ما كتبتِش. ولا حاجة من اللي قلتها لك دي عجبتك!؟