منى الشاذلى لا ترش الورد..!!

بقلم: ياسر يوسف غبريال
لا يطلب الاقباط من منى الشاذلى ان تظهر على الشاشة وتهتف ( نوركى بان ع الصلبان ) ولا ان تقول ( جانا جواب من السعودية ينصر دين المسيحية) ولا نريدها ان ترش الورد مع الصبايا لان الست العدرا زمانها جاية ولا عاوزين منها كمان ان تحط الكفة ع الميزان فيكون دين المسيح هو الكسبان .. فلسنا فى حاجة لمنى او لغيرها لكى نؤمن ونرى نور العذراء .. اللى بيفتح العيون وينور القلوب .. الاقباط يريدون فقط الحق والموضوعية .. يريدون الرأى والرأى الاخر .. لا ان تسير الحلقة كلها فى سكة انكار ظهور العذراء وان يمتد الامر الى التطاول على عقائد الاقباط بل وعلى الست العدرا .. ست الكل .
تتقعر منى الشاذلى كثيرا فى لغتها وتفتح وتغمض عينيها مثل العروسة الصينية اللى بتقول ماما وبابا وتحاول جاهدة ان تظهر للعوام انها خبيرة لغوية وربما تكون كذلك وهى طبعا ليست كذلك لكن الثابت لى انها جاهلة تاريخيا ولا تتعب نفسها وتبذل جهدا فى تحضير الحلقة فقط تنتظر الاوامر فى الزرار المتركب فى ودنها .. منى لا تعرف ان العدرا تظهر فى بلدان العالم كلها وانها ظهرت فى مصر مرات عديدة ربما اشهرها الزيتون ولكنها ليست المرة الوحيدة وعندما قال لها واحد متصل ان العدرا ظهرت فى اسيوط قالت والله ودى ظهرت فين ؟؟ فين يا منى ..!! اتقى الله  فينا  يا ست ..لى صديق خبيث يقول بل تعرف وغيرها يعرف ولكنهم بيصدروا العبيطة ..

ليست هذه المرة الاولى التى استشعر فيها مرارة الافترا فى حلقات منى الشاذلى .. اذكر استضافتها لمحمد عمارة المفكر الطائفى فى وقت كانت مصر فيه مشتعلة بحادثة طائفية ولا تحتاج لمزيد من النار والحطب .. وطبعا تركت الحبل لعمارة لكى يهاجم كما تعودنا منه .. وهل ننسى طريقة حديثها مع ام اندرو وماريو .. منى الشاذلى وطاقم برنامجها لا يرون اى مشاكل للاقباط فى مصر .. ولا يرون اى ظهورات للعدرا فى مصر .. اعتقد ان قريبا ستكون هناك حلقة عنوانها ( هل هناك اقباط فى مصر ؟؟ ) ..
ومؤخرا فى حلقتها عن ظهور العدرا بالوراق استضافت يوسف القعيد وعاطف بشاى وعلى التلفون خالد منتصر وبعد الحلقة ادركت ان الاسامى مش مهم كانوا كلهم بما فيهم الست منى عاوزين حاجة واحدة بس وهى الانكار والتريقة على الاقباط وكل واحد بطريقته مرة يقولوا جهلة ومرة اميين ومرة متخلفين ومرة هلاوس سمعية وبصرية ومرة مخادعين او مخدوعين وختمت منى الحلقة بابتسامة صفراء ثم قالت السلام عليكوا ..كيف يكون البرنامج رأى واحد ولا مجال للاختلاف فيه وعلى اى اساس يتم اختيار الضيوف .. وهل يوجد طريق اتجاه واحد بس .. وبيقولوا الكلام اخد وعطا .. الكلام كان مع منى اخد بس مفيش عطا خالص ..

بعد اربعين عاما من ظهور العدرا فى الزيتون يجى الاخ يوسف القعيد ويقولك لا ما ظهرتش انا رحت وما شوفتش .. دى غالبا انوار منعكسة على القبة .. تمام مثلما اقول هو يوسف القعيد ده ايه؟  .. كاتب روائى يا عم .. لا طبعا .. ليه ؟؟ .. لاننى لم اقرأ له اى كتاب .. هل عدم قرأتى اى كتاب ليوسف معناه انه مش اديب .. الادب فضلوه على العلم ..واحنا لا ادب ولا علم دلوقت .. كذب بس .. وانا كقبطى غيور على مصر وامنها اطالب من عنده دليل من الصحفيين او الاعلاميين اوالبنى ادمين _ من عنده دليل _ على ان ظهورات الست العدرا  نتيجة انوار صناعية او لمبات او ليزر ان يتقدم ببلاغ عاجل للداخلية ومجلس الامن ويجرسنا عالميا ومحليا .. من 68  ( قبل اختراع الليزر) ونغمة اللمبات والليزر  لم تهدأ ولا تجد ما يثبتها ..او يحقق فيها ..

ولكى تكتمل اضلاع الموضوعية الكاذبة فلابد من استضافة واحد مسيحى بس يكون مسيحى فى البطاقة .. ومسيحيو البطاقة ظاهرة موجودة فى الصحافة والاعلام وقبل ان يقول احد وهل تفتش فى الافكار والقلوب وهل تكفر اخوتك .. اقول حاشا لى ان اكفرهم بما هم كافرين به اساسا .. فالاخ عاطف بشاى الذى هو مسيحى اسما وبطاقة قال فى برنامج العاشرة مساءا اشياء تجعلنى اشك انه مسيحى فقد قال ان الاقباط يذهبون للعدرا لكى تغفر لهم خطاياهم !! وقال ان ما يحدث هلاوس بصرية وسمعية ويبدو ان موضوع الهلاوس مأثر فيه جدا فبعدها بكام يوم كتب فى مجلة روزاليوسف ان شعور الاقباط بالاضطهاد انما هو هلاوس قهرية .. وانا اقول ان عاطف بشاى يعانى من وساوس فكرية ياللا بقى خلى الكل يوسوس .. اما الطامة الكبرى عندما حكى عاطف بشاى قصة عن معجزة سمعها وقال فى نهايتها بهذه الطريقة بيخلوا العدرا ( امراءة شريرة ) واسف لكتابتى هذا التعبير ولكنه كرره اكثر من مرة .. عاطف بشاى اخو المصلح الكبير مدحت بشاى .. بجد لا اعرف لماذا اخذوا على عاتقهم مهاجمة الكنيسة فى كل زمان ومكان .. ارجو تفسير منهم لهذا الهجوم الغير مبرر ..
اما دكتور خالد منتصر فهو راجل محترم فعلا .. لكنه هجومه المستمر على ظهورات السيدة العذراء ليس له سند علمى حتى لو حاول ان يثبت ذلك .. الراجل قال فى برنامج العاشرة مساءا ان العدرا لا تظهر ولكن ده نتيجة ظاهرة طبيعة اسمها نار القديس ليمو .. والتى تحدث فى الشتاء .. فقط اقول دكتور خالد بعض النقاط التى تحتاج لمفهومية .. اولا العدرا لات ظهر فى الشتا بس  .. اساسا هو مصر بقى فيها شتا .. العدرا ظهرت عام كامل فى الزيتون وبدات فى ابريل الذى هو شهر ربيع والجو فيه بديع .. كما انها ظهرت فى اسيوط ( وكنت شاهد ضمن عشرات الالاف ) فى اغسطس الذى هو صيف حارق ..  كما انها بتظهر جوا الكنايس يعنى مفيش رعد وبرق ..اما الموضوع الثانى هى يعنى ظاهرة ليم دى ما تحصلش غير فوق قبب الكنايس .. عجايب .. عمرنا ما سمعنا عن نار ولا نور حصلت فوق جامع او فوق قبة جامعة القاهرة حتى او قبة البرلمان .. دكتور خالد انت تتحدث عن جهل مجتمعى وهذا وراد  فماذا عن جهل النخبة وهذه كارثة ..

وحتى المتصلين بالبرنامج كانت هناك عملية انتقائية لهم وكان من المتصلين اتنين مسيحيين واحد اعطته منى الشاذلى درس فى العلم والتانى تم قطع الاتصال عليه لما بدأ يصف ظهور ام النور فى كنيسة الست دميانة ببادبلو بشبرا ولكن منى الشاذلى افسحت المجال لواحد مسلم من سوهاج ليحكى كيف ظهرت له الست العدرا فى المنام وكانت تتكلم عربى وقت ازمة الرسومات الدنماركية وقالت له  بالعربى الفصيح ( ان  اليهود اذوا النبى كثيرا ) تهللت منى الشاذلى ولم تكذب او تتريق او تبرطل كعادتها .. مش كفاية الارض بتتكلم عربى.. لا دى الست العدرا كمان بتتكلم عربى ..وسارت بقية الاتصالات على نفس الهوى .. والهوا بيجيب انفلونرا الايام دى ..
وقبل ان اغلق موضوع منى الشاذلى اذكر انها كانت بين كل جملة وجملة تقول يا جماعة هذا الكلام ليس له علاقة بالعقيدة والحقيقة انا ارى ان له علاقة ونص بالعقيدة ..واللى على راسه بطحة بيحسس عليها .. فموضوع الظهورات من وجهة نظر البعض يؤكد الايمان المسيحى فماذا لو اعترفت منى الشاذلى بصحة الظهورات واقرت بنور العدرا .. سيكون الموقف محرج جدا .. اذن كان لابد ان تسير الحلقة فى هذا الاتجاه لان الموضع من وجهة نظر منى الشاذلى ليس له علاقة بالعقيدة اما عقلها الباطن فعلمه عند الله ..

وبعيدا عن منى الشاذلى التى هى النموذج الاكثر على فجاجة التعامل مع موضوع ظهو ام النور ..كانت هناك نغمة واحدة فى كل وسائل الاعلام تتلخص فى اربع نقاط :
+ العدرا لم تظهر دى مجرد اضواء صناعية او خدع او ليزر او ظاهر طبيعية ( ارجو من الكنيسة ان تعلن عن مكافأة مليون مليم لمن يستطيع كشف الخدعة )
+ كان هناك سؤال غبى يردده الكل بغباء كالببغاء .. هو يعنى يا جماعة العدرا مش بتظهر غير فى مصر وبس وعند القبط وبس ؟ ( التشخيص : جهل مزمن بالتاريخ )
+ استضافة مسيحيو البطاقة للادلاء برايهم فى هذا الظهور وطبعا كانوا بينكروا بشراسة مع توزيع الاتهامات للكنيسة وجمع تبرعات وضحك على السذج والازمات الداخلية التى تفجر الطاقات الحيوية وكلام من هذا القبيل وللتاريخ اسجل هنا بعض اسماء مسيحيو البطاقة والاعلام : كمال زاخر , رفعت فكرى , اكرم لمعى , عاطف بشاى طبعا ..
+ هى العدرا لو بتظهر .. بتظهر ليه ؟؟ ودا ممكن يكون موضوع مقال لوحده كما ان الكثير من الاخوة الافاضل فصلوا هذا الموضوع واضيف لو العدرا ظهرت عشان النكسة سنة 67 يبقى ظهرت عشان ايه سنة 86 وسنة 2000 وسنة 2009 مش معقول عشان نكسة 2009 الكروية .. شوية عقل يا اهل العقل ..

ليست مشكلتى اطلاقا مع موضوع ظهور الست العدرا ولكن جاء هذا الموضوع على الجرح وجدد فى داخل الاقباط كيفية تناول قضاياهم فى الصحف والاعلام ما بين تجاهل وافتراء .. ما بين انكار وتطرف .. ليس علينا ان نشكر منى الشاذلى او غيرها كما قال البعض لانها افسحت مجالا للحديث عن ظهور ام النور لان حديثها يفتقد المهنية والموضوعية وليس خالص لوجه الله والوطن ..ان التعامل مع حدث مثل ظهور العدرا فضح الاعلام المصرى الخاص والعام .. المقروء والمكتوب واظهر اننا نعيش فى اكذوبة كبيرة منفوخة هواء فاسد ومكتوب عليها المواطنة .. اعلامنا لم يعد عنده حياء .. اصبح يكذب بفم مفتوح ويبتسم بعيون لاترى ويدعى البصر والبصيرة .. منى الشاذلى لا ترش الورد ولكنها تزرع الشوك ..