تعرف تطبل؟

بقلم: مينا ملاك عازر
بُم برُ بُم، بُم برُ بُم، لا لا ما تلعبشي في حاجة الكلام صح أنا مش غلطان أنا بمرن نفسي وبأعلمك وبالمرة بأكسب فيك ثواب، آه بُصوا إللي طبل بجد وصل، وإللي طبل لرؤسائه وصل، وإللي ما وصلشي قطر العياط وكمان العبارة علشان كانوا بيزمروا وما بيطبلوش، مرن نفسك على الطبل أصل اكتشفت إن الطبل بقى سكة الشهرة، ويمكن تلعب معاك وتبقى عضو مجلس شعب، مش بس كده يمكن كمان تبقى واحد من كبار البلد، يا معلم ده إنتَ ممكن تبقى محتكر كبير عقبال أملتك، إنشالله أشوف عيالكم كده مطبلتية أد الدنيا، ما تقوليش تف من بُقك شفت بقى إزاي أنا بأحبك وبتمنى لك الخير؟

وزمان قالوا الجنيه غلب الكرنيه، والنهارده بيقولوا إن احتمال القصير يغلب الوزير! تفتكروا؟ بعد الخلاف الدائر حول دستورية المد -الذي سبقت عصري وأواني وتوقعته- لتقديم إقرارات الضريبة العقارية، بالمناسبة الخلاف مش عشان سواد عين الدستور –الدستور هو الشيء اللي كل ما يتعدل ... البلد يتعوج- ولا علشان القانون، لكن بيقولوا إن الباشمهندس القلقان على الدستور متضايق علشان العقارات احتمال ترخص مع بدء تطبيق قانون الضريبة العقارية ولو رخصت حيرخص الحديد ولو رخص الحديد مش حيعرف يهز السوق زي ما كان معتاد على الهز، ما تفهمنيش غلط كان متعود على هز السوق.

وبما إني سبقت وتوقعت مد مدة تقديم إقرارات الضريبة العقارية، أيوة كنت متوقعها توقعت إللي فات وبتوقع لك سر خطير قرب من الشاشة قرب كمان إنتَ مش لابس نضارة أنتي رِفلِكشَن؟ خلاص قرب ما يهمَكشي أصل الكلام الجاي مهم، لو ناوي تاخد دور أنفلونزا الخنازير إلحق خده دلوقتي عشان بيقولوا إن بعد كده علاجه حايبقى صعب وبالغلا والكوا، سيبك من إن دي الأيام الصعبة بتاعته ده كلام الدكتور الطيب "الوزيرالجبلي" لكن الكلام المفيد خده من العبد لله إلحق إتعدي اليومين دول، الدكتور بطرس ناوي يأخد ضريبة عقارية على عقار التاميفلوه وعمالين يقولوا له ده عقار أي دواء وهو يقول أي عقار حايتدفع عليه ضريبة وناوي يأخدها من الشركات المنتجة أو من الدكتور الجبلي إللي بيحاول يوضح له إن العقار المعني بالضريبة جمعه عقارات وأما عقار التاميفلوه جمعه عقاقير ولكن الدكتور بطرس منشف رأسه ومصمم يأخد ضريبة عقارية عليه. أنا قلت لك وعملت إللي عليَّ، براءة أنا كدة يا معلم؟.

نرجع لمرجوعنا ها تعرف تطبل؟ يا عم الطبل دة جميل طب، جرب تطبل لرئيسك حاتلاقيه فرحان بيك أوي، ولو جربت تطبل لمراتك حاتلاقيها راضية عنك وحماتك حاتفرح بيك مووت وتقول لك دمك شربات يا مضروب بعد أن كانت تطيق العمى ولا تطيقك ويمكن ياخدوك في منصب حساس وساعتها إبقى سلم لي على الدربُكة والحصانة مش بيقولوا أول طريق الحصانة هزة مش كده ولا إيه؟