عجبي

بقلم: ميرفت عياد
عم بطرس طول عمره ساكن جنب الحاج أمين
في المناسبات الحلوة والمرة دايمًا متجمعين
عمر ما حد منهم لدينه اتعصب
تفتكر هما مش زينا مؤمنين
عجبي!
****
بتلوموا شبابنا على الهجرة العشوائية
والمخاطرة بحياتهم على مراكب أعمارها منتهية
هو أنتم وفرتوا ليهم فرصة عمل وقوت
حتى لو كان فول وطعمية
 عجبي!
****
عيني عليكي يا قاهرة المعز
عشتي عصور في فخامة وعز
لكن جار عليك الزمن واتحنى
ظهرك من شدة العجز
عجبي!
****
بيقولوا المال يشتري حتى الرجـال
كل شيء يحققه حتى المحال
لكن يا ترى اللي معاه قـــــدر
يشترى الصحة وراحة البــــال
عجبي!
****
نفسي يا ناس نحط النقط على الحروف
ونناقش بصراحة مشاكلنا من غير خوف
بدل ما سايبين خير بلادنا يتسرق
وبنتساق للدبح زي الخروف
 عجبي!
****
يا حب يا وراء شباك الصبايا
ومداري ما في القلب من خبايا
ياترى الحب ذنب لا يُغتفر
ولا يعتبر جريمة وجنايا
عجبي!