CET 00:00:00 - 09/01/2010

مساحة رأي

بقلم: أشرف فايز
كيف يابخوي جاي تقول لي أبطل ادخن؟
والدخان مزروع في حشاي
كيف السجرة اللي ع الجسر
جدرها مزروع شوف ع الترعه في وش الكفر
بس فروعها واصلة حداي
سيبني ياخوي
سيبني اطفي الهم بنفخه
يمكن نفختي تطلع طخة
تصيب السكر وللا الضغط
وللا أيام الضنك القحط
اللي محاوطاني وعايشه معاي

وآه يابخوي
ليه عاتنبش جوة الهم
ليه عاتفتح جرح غويط
باوهم نفسي إنه اتلم
ليه عاتفور تاني الدم
وآه يابخوي
يعني ما عاتشوفشي اللي يصير
يعني ماعاتشوفشي المجانين
نازلين تعتيير
وهاتك نهب وسرقه وقتل
وهاتك هتك ف عرض الناس الفقرا
اللي في جنب الحيط بتسير

فاكر؟؟
ولا نسيت يابخوي
يوم ماجابولنا في المدعوك التلفزيون
واحد قالوا عليه مجنون
دبح خلق الله النايمة هناك في سكون
وهتك عرض المرة والراجل
زي غراب البين الحاجل
واه يابخوي

شوفت كمان الخبر العاجل
واحد قالوا عليه مجنون
ونزل دبح ياخوي ف الناس
ناس عاتصلي وتعبد ربها
طالعه يادوبك م القداس
وكيف عايكون
واحد يقتل كل الناس دي في غمضة عين
طب والشرطه دي كانت فين؟
يمكن كانت واقفه بتحرس دار العمدة
ولا دي يمكن بعد ما أكلت لحمة وفتة
قاعده تحليلها بنفسين
وآه يابخوي

شارك بآرائك وتعليقاتك ومناقشاتك في جروبنا على الفيس بوك أنقر هنا
أعرف مزيد من الأخبار فور حدوثها واشترك معانا في تويتر أنقر هنا
  قيم الموضوع:          
 

تقييم الموضوع: الأصوات المشاركة فى التقييم: ٢ صوت عدد التعليقات: ٤ تعليق

الكاتب

أشرف فايز

فهرس مقالات الكاتب
راسل الكاتب

خيارات

فهرس القسم
اطبع الصفحة
ارسل لصديق
اضف للمفضلة

مواضيع أخرى للكاتب

إبكي كمان ياراحيل

كيف ياباخوي

ياعم عدلي قصيدة للشاعر.... أشرف فايز

جديد الموقع