ذكرى الأربعين

بقلم: ميخائيل رمزى عطا الله 
في ذكرى الأربعين **** والعالم باكي حزين
على شباب في ليلة **** عيد للسما متواعدين
أنهوا صلواتهم بالفرح **  ولبيوتهم راجعيـن
لكن هناك شيطان **** متربص بينا  لعيـن
مرة اسمه كموني **** ومرة اسمه لولــي
ومرة أي اسم  **** أو واحد من المجانيـن

وفي ليلة العيد **** والكل فرحان و سعيـد
وفي لحظات أبانوب **** وصحابه بقوا  شهيد
أب  يصرخ  ليه **** ولدى اتقتل وبقى فقيد
أم تصرخ ولدى فين **** دا يا ناس وحيد

إيه الى حصل يا ناس **** إحنا منتظرينه
ليه اتقتل ولدي دا **** متعلم تعاليم دينه
محبه وسلام في **** إنجيل احنا حافظينه
المسيح في قلوبكم **** يا ولاد كنا شايفينه

كان نفسي أشوفك يا أبني **** ناجح وافرح بيك
كان نفسي أضمك لصدري **** وأهنيــــك
كان نفسي  أزفك لبيتك **** واهتف وأحييــك
أنا وأبوك لما نكبر **** يا ولدى كنّا هنتعكز عليك

لكن فى لحظة يا إبني **** رحت للسما مرتاح
وبعد ثانية من الألم **** بقيت تعاين الأفـراح
مبروك السما يا ولدي **** مع الشهدا والسواح
لكن سامحني يا بنى **** مش قادرة أبطل نواح

حنين الفراق يا ابني **** في قلبي مولع  نــار
الصبر يا رب منك  **** ادينا صبر أيوب البـار
يا ولدي  حصدك رصاص **** الغدر من الأشرار
مسيحنا علمنا التسامح **** ما علمنا ناخد بتــار

سافر يا ولدى لفوق **** فيه ملايكة مستنيـاك
سافر ياحبيبى دا **** المسيح واقف للقـــاك
سافر وأدعو لينا **** قريب نكون معــــاك
سافر يا ولدي واطلب **** نتقابل في السما هناك

ليه يا نجع حمادي **** تباتي مع أولادك حزينة
راح منك شهداء **** بقيتى في السما عظيمـة
راحوا ورا النجم **** وصدقوا الرؤية السليمة
سافروا الحبايب في **** ليلة ذكراها أليمــة

يا رب أنت سامع صلاتنا **** وكلامنا المخروس
أنت سامع الصمت جوانا **** في الصدور محبوس
يا رب أنا سامع ولادي عندك **** بيقولوا أجيوس أجيوس
أنت قادر تصبرنا وتعزينا **** وتهدي روع  النفـــوس

ناشط حقوقى
Mikhel_ra@yahoo.com