ليلة الفرح…

بقلم: هند مختار
فستان الفرح الأبيض وبدلة العريس السوداء بوردة حمرا في عروة الجاكيته…
العوالم واتمخطري يا حلوة يا زينة يا ورده من جوه جنينة.. ودقوا المزاهر يا أهل البيت تعالوا..
أهل العريس وأهل العروسة، والعزول مالهوش وجود.. في أغلب أفلام السينما قديمًا ما كان الفيلم ينتهي بالزفة المصرية الشهيرة والعريس والعروسة مع بعض إعلان لنهاية الفيلم بحلول السعادة وذهاب الشر بعيدًا.
كانت أغلب الأفلام تدور حول قصة حب بين البطل والبطلة بينهم طرف ثالث رجل أو إمرأة يلعبان دور الشر الذي كل همه التفرقة بين الحبيب إما لأن أحد الأشرار يحب البطل أو البطلة أو بسبب الغيرة أو الرغبة في أموال أحد الطرفين، يوقع العزول بين الحبيب والحبيبة ويفترقا لحين حتى تحين اللحظة الفارقة ويكتشف الطرفان الحقيقة ويختم الفيلم بمشهد الزفاف الأسطوري والذي تفنن صناع السينما في تصويره.

ألاحظ دائمًا شيء غريب في هذه الاحتفالات أنها كانت دائمًا ما تتم في المنزل سواء كان هذا المنزل قصر الباشا أوفي البيت المتواضع أو فوق سطوح البيت، دائمًا توجد عوالم وتخت وكنت تستشعر الفرحة الحقيقية في عيون الممثلين أبطال وكومبارس كأنهم في فرح حقيقي فعلاً، الآن تركز معظم الأفلام والمسلسلات على فكرة الفرح الخمس نجوم في قاعات الفنادق كنوع من أنواع الفشخرة وأصبح فرح البيت فرح فقايري.
زي ما قلت قبل ما بحبش تعبير السينما مرآة المجتمع ولكن أعتقد أنها هي والمجتمع سواء.

كلنا شفنا فيلم أم العروسة وشفنا الفرح البيتي اللي كل الستات لابسين فيه سواريه وعاملين شعرهم على الموضة والرجالة بالبدل السودا وحالقين وآخر شياكة ده كان ناقص حبه نشم ريحة البارفان، مش اللمبي اللي كان مسطول في الفرح والمعازيم بيحششوا والستات بعبايات وجلاليب بلدي (سمرا) وكلهم جايين من المدبح.
دلوقتي مع شعار (السينما النظيفة) لأن السينما قبل كانت وسـ...، وللا بلاش تلاقي الزفة ميري كأنهم في حفلة عسكرية موسيقى، وكلام مبهم غير مفهوم ومافيش عوالم لأن الرقص حرام طبعًا والممثلين مرصوصين كأنهم عساكر شطرنج.
السينما ما خلتش حاجة تخص الفرح والعريس والعروسة زمان إلا لما غنت لها وعملت لها فيلم.. دبلة الخطوبة وليلة الحنة.. شادية غنت يا دبلة الخطوبة مها صبري ماتزوقيني يا ماما.

أكتر مشهاد أفراح بتعجبني في السينما فرح عمر الشريف وفاتن حمامة في سيدة القصر لما كان بيحاول يعلمها الرقص، استعراض فستان الزفاف والطرحة لمحمد فوزي ومديحة يسري وشادية، مشاهد أفراح أفلام أنور وجدي كلها خصوصًا فيلم ياسمين مع مديحة يسري حتى فيلم شيء من الخوف مشهد الفرح الصعيدي كان باين في البهجة على الرغم من حالى الخوف اللي اللي كانت موجودة في عيون الكل، بقالي مدة كبيرة ماشفتش فرح حقيقي في السينما لأننا أكيد مش عارفين نفرح في الحقيقة، وما يهمش فرح بيتي أو فندقي وبما إننا في آخر السنة وعملية الإستفتاءات شغالة، في رأيكم إيه أحلى مشهد فرح شفتوه؟ ما تيجي إحنا كمان نعمل استفتاء..
كل سنة وأنتم طيبين وسنة سعيدة على الكل ويجعل أيامنا أغلبها أفراح وسعادة وحب.. وابعد يا شيطان إبعد يا شيطان في بيت العز يا بيتنا.